ހއ.މާރަންދޫ ކައުންސިލުގެ ނައިބު ރައީސް އަހުމަދު ރަމީޒު އަވަހާރަވެއްޖެއެވެ.
މާރަންދޫއިން ވާހަކަ ދެއްކި މީހަކު ބުނި ގޮތުގައި ރަމީޒު އަވަހާރަވީ ކުއްލި ގޮތަކަށް މިރޭ އިރާކޮޅުގެ ވަގުތެއްގައެވެ. މި ފަހުން ވެސް ވަރަށް ހަރަކާތްތެރިކޮށް އުޅުއްވި ރަމީޒު މިއަދު ހަވީރު ފުޓުބޯޅަވެސް ކުޅުއްވިއެވެ. މި ގޮތުން މިއަދު ހަވީރު ހއ. މާރަންދުއާއި ހދ. ނެއްލައިދޫ ޒުވާނުންގެ މެދުގައި ކުޅުނު އެކުވެރިކަމުގެ ފުޓުބޯޅަ މެޗެއްގައި ވެސް ރަމީޒު ކުޅުނެވެ. އެ މެޗުގައި ވަކި ހިސާބަކުން ދަނޑުން ފޭބީ މާބޮޑަށް ވަރުބަލިވާ ކަމަށް ބުނެފައެވެ. ނަމަވެސް މެޗު ނިމެންދެން އިންނެވީ ބެންޗުގައެވެ.
ފުޓްބޯޅަ މެޗު ނިމުމުން މާބޮޑަށް ހޮޑުލާތީވެ، އިތުރު ފަރުވާއަށް ރަމީޒު ގެންދިއައީ ހއ. ދިއްދޫ ހޮސްޕިޓަލަށެވެ. ރަމީޒު އަވަހާރަވީ ދިއްދޫ ހޮސްޕިޓަލުގައި ފަރުވާދެނިކޮށެވެ.
އެމްޑީޕީގެ މެމްބަރެއްގެ ގޮތުގައި އިންތިހާބުވެފައިވާ ރަމީޒު އަވަހާރަވުމުގެ ހިތާމައިގައި އެ ޕާޓީންވެސް ވަނީ ބަޔާނެއް ނެރެފައެވެ.
އުމުރުން 39 އަހަރުގެ އަހުމަދު ރަމީޒު އަވަހާރަވިއިރު އަނބިކަނބަލުންނާއި ތިން ދަރިން ވެސް ތިއްބަވައެވެ.
