ހިޔާ ފްލެޓުގެ އެޕާޓުމަންޓަކަށް ގެންގޮސްގެން މީހުންނަށް ބިރުދައްކައި، ފޭރުމުގެ މައްސަލައިގެ ތަފްސީލު ފުލުހުން މިއަދު ހާމަކޮށްފިއެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ވަނީ ހިޔާ ފްލެޓު ’އެޗް5’ގެ 318 ނަންބަރު އެޕާޓްމަންޓަށް މީހުން ގެންގޮސް ފޭރުނު މައްސަލައާ ގުޅޭ ގިނަ މައުލޫމާތުތަކެއް މީޑިއާއާއި ހިއްސާކޮށްފައެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ހުޅުމާލޭ ފޭސް ދޭއް ޕޮލިސް ސްޓޭޝަންގެ ހެޑް، ސުޕްރިޑެންޓް އޮފް ޕޮލިސް ރަޖުނީ ޝުއައިބު ވިދާޅުވީ، އެ އެޕާޓްމަންޓަށް އޮޅުވާލައިގެން މީހުން ގެންގޮސް ބިރުދައްކައި ޖިސްމާނީ އަނިޔާކޮށް އެ މީހުން ގަދަކަމުން ބަރަހަނާކުރުމަށް ފަހު ބްލެކްމެއިލްކޮށްގެން އެ މީހުންގެ އަތުން ގިނަ އަދަދެއްގެ ފައިސާއާއި މޯބައިލްފޯން ފަދަ ތަކެތި އަތުލާފައިވާ ކަމަށެވެ. މި އަމަލު ހިންގާފައިވަނީ ހިޔާ ފްލެޓުގެ އެޗް5 – 318 ނަމްބަރު ފުލެޓުގައެެވެ. މި ފްލެޓުގައި މި އަމަލު ހިންގުމުގައި ހަރަކާތްތެރި ވެފައިވާ 7 މީހުންނަކީ:
މ. ގޯންބިލިގަސްދޮށުގެ، އައިމިނަތު ހުމައިނާ ޒަކަރިއްޔާ، 24އ
މ.ގޯންބިލި ގަސްދޮށު، ގެ އާޔަތު އައްބާސް، 30އ
ގއ. ދާންދޫ، ޕެލަސް ހައުސް، މުހައްމަދު އާދަމް، 43އ
ގ. ހަނދުމާގެއާގެ، ސަމާހް އަލީ، 31އ
ދ. ކުޑަހުވަދޫ، ސަންފްލާވާ، މުޙައްމަދު މުނީރު، 35އ
ނ. ވެލިދޫ، ހިފާޒް، އަހުމަދު މާދިހް،33އ
މ.ސީނަރީވިއު، އަހުމަދު މަދީހް، 34އ
ފުލުހުން މައުލޫމާތުދޭ ގޮތުގައި މި މައްސައިގެ ތަހުގީގުގެ ތެރެއިން ބަލަމުންދާ ފަސް މައްސަލައިގައި ވެސް އިސްކޮށް ހަރަކާތްތެރިވެފައިވަނީ މި މައްސަލާގައި ހިމެނޭ ދެ އަންހެނުން ކަމަށްވާ އައިމިނަތު ހުމައިނާ ޒަކަރިއްޔާއާއި އާޔަތު އައްބާސްއެވެ.
މީގެ އިތުރުން މި މައްސަލައިގައި ހިމެނޭ މީހުންނަކީ ތަފާތު ކުށުގެ ރިކޯޑް އޮތް މީހުނެވެ.
މިއަދުގެ ޕްރެސް ކޮންފަރެންސްގައި ރަޖުނީ ވިދާޅުވީ، އެ އެޕާޓްމަންޓަށް މީހުން ގެންގޮސްފައިވަނީ އެ ތަނުގެ ތެރޭގައި ފައިސާއަށް ހަށިވިއްކާ ކަމަށް އިޝްތިހާރުކޮށްގެން ކަމަށެވެ. އެގޮތުން، ސޯޝަލް މީޑިއާގެ އެކިއެކި ޕްލެޓްފޯމްތަކުގައި އަންހެނުންގެ ނަމުގައި އައިޑީތައް ހަދައިގެން ފިރިހެނުންނާ ގުޅުން އުފެއްދުމަށް ފަހު ހަށިވިއްކާ ކަމަށް ބުނެ އޮޅުވާލައިގެން އެ އެޕާޓްމަންޓަށް މީހުން ގެންދިޔައެވެ.
މީގެ އިތުރުން މި މައްސަލައިގައި ހިމެނޭ އަންހެނުން ހިޔާ ސަރަހައްދުން އުމުރުން ދުވަސްވީ މީހުންނާ ބައްދަލުކޮށް ހަށިވިއްކާ ކަމަށް ބުނެ އެ އެޕާޓްމަންޓަށް މީހުން ގެންގޮސް ބަރަހަނާކޮށް ފައިސާ ފޭރިފައިވާ ކަމަށް ވެސް ރަޖުނީ ވިދާޅުވިއެވެ.
އެ އެޕާޓްމަންޓް ތެރޭގައި ހަށިވިއްކުމާއި، މީހުން އޮޅުވާލައިގެން ގެންގޮސް ބަރަހަނާކޮށް މީހުންގެ ބަރަހަނާ ވީޑިއޯނަގައި ބްލެކްމެއިލްކޮށް ފައިސާ ހޯދުމާއި އެ ތަނުގެ ތެރޭގައި މަސްތުވާތަކެތި ވިއްކައި ވިޔަފާރި ކުރުމާއި މަސްތުވާތަކެތި ބޭނުން ކުރުންފަދަ ގާނޫނާ ހިލާފު އެތައް އަމަލެއްވެސް މި އެޕާޓްމަންޓު ތެރޭގައި ވަނީ ހިންގާފައެވެ. މި އެޕާޓްމަންޓަކީ ތަފާތު ކުށްތައްކުރާ ތަނަކަށްވާތީ އެޗްޑީސީއާ ގުޅިގެން އަޅަންޖެހޭ ފިޔަވަޅުތައް އެޅުމުގެ މަސައްކަތް ކުރަމުން އަންނަ ކަމަށްވެސް ފުލުހުން ވިދާޅުވިއެވެ.
މި ގުރޫޕަށް މި އަމަލު ހިންގުމަށް މަގުފަހިވީ އެތަނަށް ދިޔަ މީހުން ރިޕޯޓު ނުކުރުމުންނެވެ. ފުލުހުންވެސް ފާހަގަކުރި ގޮތުގައި މިގޮތަށް އެޕާޓްމަންޓަށްދިޔަ އެތައް ބަޔަކު އެކަމުގެ ޝިކާރައަކަށްވެފައިވަނީ އެ މީހުންނަކީ ގާނޫނާ ހިލާފު ކުށެއް ކުރުމަށް އެ ތަނަށް ދިޔަ ބަޔަކަށްވާތީއާއި ބަރަހަނާ ވީޑިއޯ ލީކްކޮށްލަފާނެކަމުގެ ބިރުއޮތުމުން ގިނަ މައްސަލަތަކެއް ފުލުހުންނަށް ރިޕޯޓްކޮށްފައިނުވާ ކަމަށެވެ. އަދި، މި ކަމުގައި އަނިޔާ ލިބުނު މީހުންކަން ހިނގިގޮތާ ހިލާފަށް ސޯޝަލް މީޑިއާގައާއި ފުލުހުންގެ ތަހުގީގުގައި ވެސް ވާހަކަދައްކާފައިވާ ކަމަށްވެސް ފުލުހުން ފާހަގަކުރިއެވެ.
”ރިޕޯޓްކުރި ފަރާތްތަކުން އެޕާޓްމަންޓަށް ދިޔައީ އަމިއްލައަށް ނޫން ކަމަށާއި އެ މީހުން އެޕާޓްމަންޓަށް ބިރުދައްކައިގެންނާއި ގަދަކަމުން ކަމަށް ފުލުހުންގެ ތަހުގީގަށް ބަޔާން ދީފައިވޭ. ނަމަވެސް، ސީސީޓީވީ ފްޓޭޖްތައް ބެލިއިރު އަޅުގަނޑުމެންނަށް ފާހަގަކުރެވޭ އެ މީހުން އެ އެޕާޓްމަންޓަށް ގޮސްފައިވަނީ އެ މީހުންގެ އަމިއްލަ އިހުތިޔާރުގައިކަން. އަދި، އަޅުގަނޑުމެން ތަހުގީގަށް އެކަން އެނގޭ ހިސާބުން އެ މައްސަލަ ކުރިއަށް ގެންދަން ބޭނުންނުވާ ކަމަށް ބުނެފައިވާކަން ފާހަގަކޮށްލަން،“ ރަޖުނީ ވިދާޅުވިއެވެ.
އޭނާ އިތުރަށް ވިދާޅުވީ މި މައްސަލައިގައި ތުހުމަތުކުރެވޭ އިތުރު މީހުން ތިބު މާއެކު އެ މީހުން ހޯދައި ހައްޔަރުކުރުމުގެ މަސައްކަތް ކުރަމުން އަންނަ ކަމަށެވެ.
މި މައްސަލާގައި އިސްކޮށް ހަރަކާތްތެރިވި އެކަމު ކަމަށްވާ ހުމައިނާއަކީ މާބަނޑު އަންހެނަކަށްވާތީ އޭނާގެ ސިއްހީ ހާލަތަށް ރިއާޔަތްކޮށް ކޯޓަށް ނުގެންގޮސް ވަނީ ދޫކޮށްލާފައެވެ.
