ރައްޔިތުން މަޖުލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ، މަޖުލީހުގެ ނައިބްރައީސް ކަމުން ވަކިކުރުމުގެ މައްސަލަ މިއަދުވެސް ހިނގާގޮތެއް ނުވިއެވެ. މީގެ ކުރިން އަމީންއާއްމު ދެކޮޅު ހަދަމުންދިޔައީ އީވާގެ މައްސަލަ އެޖެންޑާ ކުރުމަށެވެ. އެތައް ފާޑުކިއުމެއް އަމާޒުވި މި މައްސަލާގައި އަމީންއާއްމު އެންމެ ފަހުން ނިންމެވީ އީވާގެ މައްސަލަ މަޖުލީހުގެ މިއަދުގެ ޖަލްސާއަށް އެޖެންޑާ ކުރުމަށެވެ. މި މައްސަަލަ އެޖެންޑާ ކުރުމަށް ހަމަޖެހުނުކަމުގައި ވިޔަސް މީގެ ކުރިން މަޖުލީހުގެ ރައީސް މުހައްމަދު ނަޝީދުވަނީ އެ މަނިކުފާނު މަޖުލީހުގެ ރިޔާސަތާއި ހަވާލުވާން އުޒުރުވެރިވާ ވާހަކަ އަމީންއާއްމަށް ދަންނަވާފައެވެ. އެހެންކަމުން މިއަދުގެ ޖަލްސާއަށް އީވާގެ މައްސަލަ އެޖެންޑާ ކުރުމުންވެސް މި މައްސަލަ ނުހިނގާނެކަން އާއްމުންނާއި ސިޔާސީ ފަރާތްތަކުންވެސް ދިޔައީ ގަބޫލުކުރަމުންނެވެ.
މިއަދުގެ ޖަލްސާ ފަށަމުން ރައްޔިތުންގެ މަޖުލީހުގެ އިދާރީ މޭޒުން، އަމީންއާއްމު ފާތުމަތު ނިއުޝާ ވިދާޅުވީ މިއަދު ޖަލްސާގެ ރިޔާސަތުގައި އިންނަން ޖެހޭނީ ރައްޔިތުންގެ މަޖްލީހުގެ ރައީސް ކަމަށާއި، އެކަން އެމަނިކުފާނަށް އަންގާފައިވާނެ ކަމަށެވެ. މި މައްސަލާގައި ގޮތެއް ކަނޑަނޭޅެނީސް މިވަގުތު މި ޖަލްސާ ކުރިޔަށް ގެންދެވެން ނެތް ވާހަކަ މެންބަރުންނަށް ދަންނަވާލަން ކަމަށް ވދާޅުވެ މިއަދުގެ ރައްޔިތުންގެ މަޖުލީހުގެ ޖަލްސާ ވަނީ ނިންމާލާފައެވެ.
މިއަދުގެ ޖަލްސާއަށް ރައްޔިތުންގެ މަޖުލީހުގެ ރައީސް މުހައްމަދު ނަޝީދު ހާޒިރެއް ނުވެއެވެ.
