މި ދައުރުގެ ތެރޭގައި މިހާތަނަށް 127 ރަށަށް އެމްބިއުލާންސް ފޯރުކޮށްދީފައިވާ ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
މިއުވާން މިހެން ވިދާޅުވީ، މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، ނޫސްވެރިންގެ ފަރާތުން ލިބިފައިވާ ބައެއް ސުވާލުތަކުގެ ތަފްސީލު ހިއްސާކުރައްވަމުންނެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން މިއުވާން ވިދާޅުވީ، 127 ރަށަކަށް އެންބިއުލެންސް ފޯރުކޮށްދީފައިވާއިރު، އޭގެ ތެރޭގައި އަލަށް އެންބިއުލެންސް ފޯރުކޮށްދިން ރަށްތައްވެސް ހިމެނޭ ކަމަށެވެ. އަދި ބޭނުން ނުކުރެވޭ ހާލަތުގައި އެންބިއުލެންސް ހުރި ރަށްތައް ވެސް އޭގެ ތެރޭގައި ހިމެނޭ ކަމަށް މިއުވާން ވިދާޅުވީއެވެ.
މީގެއިތުރުން، މިއުވާން ވިދާޅުވީ، އެމްބިއުލާންސް ފޯރުކޮށްދިނުމުގައި އެމްބިއުލާންސް ނެތް ރަށްރަށާއި އެމްބިއުލާންސް މަރާމާތުކުރަންޖެހިފައި ހުރި ރަށްރަށަށް އިސްކަންދީފައިވާ ކަމަށެވެ.
އެގޮތުން، އާބާދީއަށް ބަލައި އެއް އެމްބިއުލާންސް އޮންނަ ރަށްރަށް ހުންނަކަން މިއުވާން ފާހަގަކުރެއްވިއެވެ. މިއުވާން ވިދާޅުވީ، އެ އެމްބިއުލާންސަށް މައްސަލައެއް ދިމާވުމުން އެކަން ވީހާވެސް އަވަހަށް ހައްލުކުރުމަށް ސަރުކާރުން މަސައްކަތްކުރަމުންދާ ކަމަށެވެ.
ރަށްރަށުގައި އެމްބިއުލާންސްގެ ހާލަތު ހުރި ގޮތް ރައީސް އޮފީހުން ބަލަމުންގެންދާ ކަން ފާހަގަކުރައްވާ މިއުވާން ވިދާޅުވީ، މިހާރުވެސް ގެންނަން ހަމަޖެހިފައިވާ އެމްބިއުލެންސް ތައް ދޭނެ 24 ރަށެއް ވަރަށް އަވަހަށް ކަނޑައެޅޭނެ ކަމަށެވެ.
އަދި އެމްބިއުލާންސް ގެނައުމުގެ މަސައްކަތް މިހާރުވެސް ކުރަމުންދާ ކަމަށާއި ޖަޕާން ސަރުކާރުގެ ހިލޭ އެހީގެ ދަށުން ފޯރުކޮށްދޭ އަށް ޕެރަމެޑިކް އެމްބިއުލާންސް ކުރިއަށް އޮތް މަދު ހަފުތާތަކުގެ ތެރޭގައި ލިބޭނެކަން ޖަޕާން ސަރުކާރުން އަންގާފައިވާކަން ވެސް މިއުވާން ހާމަކުރައްވައެވެ.
