ޖުޑިޝަލް ސާވިސް ކޮމިޝަން (ޖޭއެސްސީ)ން ސުޕްރީމް ކޯޓު ތަމްސީލުކުރުމަށް ފަނޑިޔާރު ހުސްނުއްސުއޫދު މިއަދު ހަމަޖައްސައިފިއެވެ.
ޖޭއެސްސީގައި ސުޕްރީމް ކޯޓުގެ ފަރާތުން މިހާތަނަށް ހުންނެވީ އެ ކޯޓުގެ ފަނޑިޔާރު އައިޝާ ޝުޖޫން މުހައްމަދެވެ. އޭނާ އައްޔަންކޮށްފައިވަނީ 2019 ވަނަ އަހަރުގެ ޑިސެންބަރު މަހުގެ ތެރޭގައެވެ. ސުޖޫންގެ މަގާމު ހަމަވާނީ މި އަހަރު ފަހުކޮޅުގައެވެ.
ސުޕްރީމް ކޯޓުން ބުނީ، ޖޭއެސްސީގައި އެ ކޯޓު ތަމްސީލުކުރުމަށް ފަނޑިޔާރު ސުއޫދު ހަމަޖައްސާފައިވާ ކަމަށެވެ. މި ކުއްލި ނިންމި ސަބަބެއް ކަމަށް ބުނެފައިވަނީ ފަނޑިޔާރު ސުޖޫން އިސްތިއުފާ ދެއްވާފައިވާތީ ކަމަށެވެ. ނަމަވެސް މިހާތަނަށް އެކަން ފަނޑިޔަރު ސުޖޫން އަދި ޖޭއެސްސީންވެސް އިއުލާންކޮށްފައި ނުވެއެވެ.
ރައްޔިތުންގެ މަޖުލީހުން އިތުބާރު ނެތް ކަމަށް ނިންމި 2 މިނިސްޓަރުން ކަމަށްވާ ޑރ.ޝަހީމު، ޑރ.ހައިދު އަދި އޭޖީ އުޝާމަށް، ރައީސް ޑރ.މުއިއްޒު އަލުން މަގާމު ދެއްވުމުން ހުވާލައިދެއްވީ ފަނޑިޔާރު ހުސްނު ސުއޫދެވެ. މީގެ އިތުރުން މަޖުލީހުގެ ކޯރަމް ބެލުމަށް ނިންމާފައިވާ ނިންމުމާއި ރައީސް އަޒުލު ކުރުމަށް ނިންމާފައިވާ ކޯރަމު ގެ ގަވައިދުވެސް ސްޕްރީމް ކޯޓުން ވަނީ ސަރުކާރު ބޭނުންވި ގޮތަށް ވަގުތީ އަމުރެއް ނެރެފައެވެ. މި މައްސަލާގައި ރައްޔިތުންގެ މަޖުލީހުން ނިންމާފައިވަނީ ސްޕްރީމު ކޯޓުގެ އަމުރަށް ތަބާ ނުވުމަށެވެ.
ޖޭއެސްސީގައި ތިއްބަވަނީ އުއްތަމަ ފަނޑިޔާރު ފިޔަވައި ސުޕްރީމް ކޯޓުން ކަނޑައަޅާ ފަނޑިޔާރެއްގެ އިތުރުން، ހައި ކޯޓުން އިންތިޚާބުކުރާ އެ ކޯޓުގެ ފަނޑިޔާރަކާއި، ދަށު ކޯޓުތަކުން އިންތިޚާބުކުރާ ދަށު ކޯޓެއްގެ ފަނޑިޔާރެކެވެ. ގާނޫނީ ވަކީލުންގެ ތެރެއިން އިންތިޚާބުކުރާ ވަކީލެއްގެ އިތުރުން ދައުލަތުގެ ބަންޑާރަނައިބު ވެސް އިންނަވައެވެ. އަދި، ރައީސުލްޖުމްހޫރިއްޔާ އައްޔަންކުރައްވާ މެންބަރަކާއި، ރައްޔިތުންގެ މަޖިލީހުގެ ރައީސާއި، ސިވިލް ސާވިސް ކޮމިޝަންގެ ރައީސާއި، މަޖިލީހުން ކަނޑައަޅާ މެންބަރަކާއި، މަޖިލީހުން ކަނޑައަޅާ އާންމުންގެ މީހެއް ވެސް ޖޭއެސްސީގައި ހިމެނެއެވެ.
