އިންޓަނެޓު ބެންކުން ލާރި ޓްރާންސްފަރ ކުރުމަށް އެދުމުން ލިބޭ އޯޓީޕީ ބޭނުންކޮށްގެން މީހެއްގެ އެކައުންޓުން 500،000ރުފިޔާ ނަގައިފިއެވެ.ޕޮލިހުން މައުލޫމާތުދޭ ގޮތުގައި ފުލެޓު ލިބުނު ކަމަށް ބުނެ ލިބުނު ކޯލަކުން އެދުނީ އެ ފަރާތުގެ ފޯނަށް ދިޔަ އޯޓީޕީ މެސެޖު ކިޔާ ދިނުމަށެވެ. އެ ގޮތުން އޯޓީޕީ ނަމްބަރު ދިނުމުން އެ ފަރާތުގެ އެކައުންޓުން ވަނީ 500،000ރ އެއް ފަހަރާ ވަނީ ނަގާފައެވެ. މިއީ މި ހަފްތާގައި ފުލެޓު ސްކޭމުގައި ޖެނުނު ދެވަނަ މައްސަލައެވެ. މީގެ 2 ދުވަސް ކުރިން ފުލެޓު ލިބޭނެ ކަމަށްބުނެ ކުރި ކޯލަކަށް އޯޓީޕީ ހިއްސާ ކުރުމުން އެ ފަރާތުގެ އެކައުންޓުން ވަނީ 200،000 ރުފިޔާ ނަގާފައެވެ. ޕޮލިހުން ހާމަކޮށްފައިވާ ތަފާސް ހިސާބުތަކަށް ބަލާއިރު މި ގޮތަށް އޮޅުވާލައިގެން އޯޓީޕީ ފަދަ ސިއްރު މައުލޫމާތު އެހެން ފަރާތްތަކާއި ހިއްސާކޮށްގެން 24 މިލިއަނަށްވުރެ ގިނަ ރުފިޔާ ވަނީ ސްކޭމަރުންނަގާފައެވެ. މީގެ ތެރެއިން ހޯދިފައިވަނީ މިލިއަނެއްހާ ރުފިޔާއެވެ.
ބެންކު އޮފް މޯލްޑިވްސް އަދި މޯލްޑިވްސް ޕޮލިސް ސަރވިސްއިން ތަކުރާރުކޮށް އާއްމުންނަށް ހަނދާންކޮށްދެމުން އަންނަނީ ބެންކު އެކައުންޓުގެ ޕާސްވޯޑާއި ފައިސާ ޓްރާންސްފަ ކުރުމަށް ފޯނަށް އަންނަ އޯޓީޕީ މެސެޖު އެހެން ފަރާތަކަށް ހިއްސާ ނުކުރުމަށެވެ. ނަމަވެސް އަދިވެސް ހޭލުންތެރިކަން ނެތް ގިނަ ބަޔަކު އަންނަނީ މި ފަދަ ސިއްރު މައުލޫމާތު އެހެން ފަރާތްތަކާއި ހިއްސާކުރަމުންނެވެ. މިކަމުގެ ނަތީޖާއެއްގެ ގޮތުން މާލީ ގޮތުން ބޮޑެތި ގެއްލުންތައް އެފަރާތްތަކަށް ލިބެއެވެ.
އެކައުންޓުން ފައިސާ ނެގުމުގެ އިތުރުން ވެރިފަރާތް ކަށަވަރު ނުވާ މުދަލަށް ފައިސާ ދެއްކުމާއި، މުދާ ނުލިބެނީސް އޮންލައިންކޮށް ފައިސާ ފޮނުވުން ފަދަ އެތައް އުކުޅެއް ބޭނުންކޮށްގެން ސްކޭމަރުން އަންނަނީ މީހުންނަށް ލަނޑު ދެމުންނެވެ.
