ބިންވެރިޔާ ސްކީމުގެ ދަށުން ކުރީ ސަރުކާރުން ދޫކޮށްފައިވާ ގޯތިތަކަށް ބަދަލު އަންނާނެ ކަމަށާއި އެކަން މި ސަރުކާރުން ވަރަށް އަވަހަށް ގޮތެއް ނިންމާނެ ކަމަށް ހައުސިން މިނިސްޓަރ ޑރ.ހައިދަރު ވިދާޅުވެއްޖެއެވެ. ރައްޔިތުންގެ މަޖުލީހުގެ ގައުމީ ތަރައްގީއާއި ތަރިކައާއި ބެހޭ ކޮމެޓީއަށް ހާޟިރުކޮށް، މެމްބަރުން ކުރެއްވި ސުވާލުތަކަށް ޖަވާބުދެއްވަމުން ޑރ.ހައިދަރު ވިދާޅުވީ ކުރީ ސަރުކާރުން ގުޅީފަޅާއި ގިރާވަރު ފަޅުގެ ލޭންޑުޔޫސް ޕްލޭން ހަދާފައި އޮތީ ބަލަންވާ ވަރަށް ނުބަލައެވެ. އެހެންކަމުން މިސަރުކާރުން އަލުން ލޭންޑުޔޫސް ޕްލޭން ހަދާފައިވާ ކަމަށާއި ވަރަށް އަވަހަށް އެ ޕްލޭން އާއްމުންނަށް ފެންނާނެގޮތް ހަދާނެ ކަމަށެވެ. ލޭންޑުޔޫސް ޕްލޭނަށް ބަދަލު ގެނައުމުން ކުރިން ގޯތިތައް ދީފައިވާ ތަންތަނަށް ބަދަލު އަންނާނެ ކަމަށްވެސް މިނިސްޓަރު ވިދާޅުވިއެވެ.
ކުރީ ސަރުކާރުން އެންމެ ބޮޑަށް ބޭނުންވި މާލޭ ޕޯޓު ސަރަހައްދު އެއްކޮށް ގުޅީފަޅަށް ބަދަލު ކުރުމަށެވެ. ނަމަވެސް މި ސަރުކާރުން ބޭނުންވަނީ ބަނދަރު ތިލަފުށީގައި ގާއިމު ކުރުމަށެވެ. ކުރީ ސަރުކާރުގެ ވެރިން ވިދާޅުވަމުންއައީ ގުޅިފަޅުގައި އަލުން ބަނދަރެއް ހެދުމުން މާ ފުރިހަމައަށް ހެދޭނެކަމަށާއި ހަރަދުގެ ގޮތުންވެސް އެތައް ތަނެއް އަގު ހެޔޮކޮށް ކުރެވޭނެ ކަމަށެވެ. ތިލަފުށީގައި އަމިއްލަ ވިޔަފާރިވެރިންގެ ބަދަރުތަކެއް ހަދާފައި ހުރުމުން ސަރުކާރުން ބަނދަރެއް ހަދާނަމަ އެ ބަނދަރުތަކަށް ބޮޑު ބަދަލެއް ދޭން ޖެހެއެވެ. މި ސަރުކާރުން ޕްލޭންކޮށްފައިވާ ތިލަފުށީ ސަަރަހައްދުގައި މިހާރުވެސް އަމިއްލަ ވިޔަފާރިވެރިންގެ 3 ބަނދަރު ހިމެނެއެވެ.
