މަސްވެރިން ސަރުކާރުގެ ކުންފުނި ތަކަށް ވިއްކާފައިވާ މަހަށް ދޭން ޖެހޭ ފައިސާ ނުލިބި 2 މަހަށްވުރެ އިތުރުވެފައިވާކަން ހާމަ ވެއްޖެއެވެ. މަސްވެރިންނަށް ދޭން ޖެހޭ ފައިސާގެ މައްސަލާގައި ރައްޔިތުންގެ މަޖުލީހަށް ފިޝަރީޒް މިނިސްޓަރ އަހުމަދު ޝިޔާމު ހާޟިރުކޮށް ސުވާލުކުރުމުން ދެއްވި ޖަވާބަށް ނުރުހުންވެ ބައެއް މަސްވެރިންނާއި، މަސްވެރިންނާއި ގުޅުންހުރި ފަރާތްތަކުން ބުނަނީ ސަރުކާރުން އަދިވެސް ގިނަ އަދަދެއްގެ ފައިސާ ދޭން ޖެހިފައިވާ ކަމަށެވެ. މި ގޮތުން ބައެއް ދޯނި ތަކަށް 7 މިލިއަނަށްވުރެ ގިނަ ރުފިޔާ ދޭން ޖެހިފައިވާއިރު 2 މިލިއަން ރުފިޔާ ދޭން ޖެހޭ ވަކިވަކި ދޯނި ފަހަރުވެސް އުޅޭ ކަމަށްވެއެވެ. މި ދޯނިތަކުގެ ބައެއް ވެރިން ސޯސަލް މީޑިއާގައި އަންނަނީ ކަންބޮޑުވުންނ ފާޅު ކުރަމުންނެވެ. މި ގޮތުން އެމީހުންގެ ޒަރޫރީ ބޭނުންތަކުގެ އިތުރުން ދޯނީގެ ބައެއް ކަންކަމާއި ތެޔޮ އެޅުން ފަދަ ކަންކަންވެސް ނުކުރެވޭ ކަމަށް އެމީހުން ދަނީ ބުނަމުންނެވެ.
އެސްޓީއޯގެ ކުރީގެ މެނޭޖިންގ ޑިރެކްޓަރ ހުސެއިން އަމުރު އެކްސްގައި ކުރެއްވި ޕޯސްޓެއްގައި ވިދާޅުވީ ވަރަށް ގިނަ މަސްވެރިންނާއި ބައްދަލުކޮށް ވާހަކަ ދެކެވިއްޖެ ކަމަށާއި ޑިސެމްބަރު 17 ގެ ފަހުން އެންމެ ބިލަކަށްވެސް ސަރުކާރުން ލާރި ނުދޭ ކަމަށެވެ. ވަކި ވަކި ދޯނި ތަކަށް މިލިއަނުން ފައިސާ ދޭން ހުރި ކަމަށްވެސް އަމަރު ވިދާޅުވެފައިވެއެވެ.
މަސްވެރިންނަށް ދޭން ޖެހޭ ފައިސާ ދިނުމުގައި ސަރުކާރަށް ބުރަ ބޮޑުވުމުން އިއްޔެއިން ފެށިގެން ކުރިން މަސް ގަންނަމުން އައި އަގު ކަމަށްވާ 25 ރުފިޔާއަށް ކިލޯއެއްގެ ބަދަލުގައި 20 ރުފިޔާއަށް ކިލޯއެއް ގަންނަން ވަނީ ސަރުކާރުން ނިންމާފައެވެ.
