ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން ކޮވިޑް-19 އަށް 209 މީހަކު ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.
މިއީ މި ފަހަކަށް އައިސް ކޮވިޑް19 އަށް ޕޮޒިޓިވްވީ މީހުން އެންމެ ގިނައިން ފެނުނު ދުވަހެވެ. އެޗްޕީއޭއިން މައުލޫމާތުދޭ ގޮތުގައި މިހާރަކަށް އައިސް ހަލުވިކަމާ އެކު ދަނީ ކޮވިޑް ފެތުރެމުންނެވެ. އަދި ދާދި އަވަހަށް ކޮވިޑަށް ހާއްސަކޮށްފައިވާ ހޮސްޕިޓަލްތަކުގެ އެނދުތައްފުރި ބަލި މީހުންނަށް ފަރުވާ ދިނުމުގައި ދަތިތަކެއް ދިމާވެދާނެއެވެ. އެޗްޕީއޭގެ ތަރުޖަމާން ޑޮކްޓަރ ނަޒްލާ ރަފީގު ސިފަކުރެއްވި ގޮތުގައި މިހާރު ފެތުރެމުން މިދަނީ ކޮވިޑް19 ގެ އެންމެ ނުރައްކާތެރި ރާޅެވެ. އެހެންކަމުން އެންމެންގެ ސަމާލުކަމަށްޓަކައިވެސް ކުރިން ލުއިދިން ބައެއް ފިޔަވަޅުތަކަށް ވަނީ ބަދަލުތަކެއް ގެނެސް ހަރުކަށި ފިޔަވަޅު ތަކެއް އަޅާފައެވެ.
ވޭތުވެދިޔަ 24 ގަޑިއިރު އެޗްޕީއޭގެ ތަފާސް ހިސާބުތަކަށް ބަލާއިރު ރާއްޖެއިން ކޮވިޑަށް ޕޮޒިޓިވްވީ މީހުންގެ ޖުމްލަ އަދަދު ވަނީ 17،716 އަށް އަރާފައެވެ. މިދިޔަ 24 ގަޑިއިރުގެ ތެރޭގައި ޕޮޒިޓިވްވި މީހުންގެ ތެރޭގައި މާލެ ސަރަހައްދުން ޕޮޒިޓިވްވި 101 މީހަކާއި، ރަށްރަށުން ޕޮޒިޓިވްވި 15 މީހެއްގެ އިތުރުން ރިސޯޓްތަކުން ޕޮޒިޓިވްވި 6 މީހަކު ހިމެނެއެވެ.
ފާއިތުވެދިޔަ 24 ގަޑިއިރުގެ ތެރޭގައި 40006 ސާމްޕަލް ނަގައި، ޓެސްޓުކޮށްފައިވެއެވެ. މައުލޫމާތުތައް ދައްކާގޮތުން ހޮސްޕިޓަލުގައި މިހާރު ފަރުވާދެމުންދަނީ 190 މީހަކަށެވެ. މިވަގުތު ބައްޔަށް ފަރުވާ ހޯދަމުންދާ ޖުމްލައަކީ 2،360 އެވެ. މި ބަލިން މިހާތަނަށް ރާއްޖެއިން ވަނީ 15,291 މީހަކު ރަނގަޅުވެފައެވެ.
