ރައްޔިތުން މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލާގައި ކުރިއަށްދާނެ ގޮތެއްގެ ލަފާ ހޯދުމަށް ބަންޑާރަ ނައިބަށް ހުށައަޅަން ފާސްކޮށްފިއެވެ.
އާއްމު ކޮމެޓީއަށް އަލިފުށީ ދާއިރާގެ މެމްބަރު މުހައްމަދު ރަޝީދު ހުށައެޅުއްވީ ދެން ކުރިއަށް ދާނެ ގޮތުގެ ގާނޫނީ ލަފައެއް ހޯދަން ބަންޑާރަ ނައިބަށް ދެންނެވުމަށެވެ. މެމްބަރު ވިދާޅުވީ އާއްމު ކޮމެޓީއަށް ލިބިފައިވާ މޭންޑޭޓުގެ ތެރޭގައި އެގޮތަށް ލަފާ ހޯދުން ހިމެނޭ ކަމަށާއި އެކަމުގެ ސަބަބުން އަމީންއާއްމުގެ މަސައްކަތަށްވެސް އެހީތެރިކަމެއް ދެވޭނެ ކަމަށެވެ.
ނަޝީދުގެ އިތުބާރު ނެތްކަމުގެ ގަރާރު ހުށަހަޅަން މިއަދު ބޭއްވި މަޖިލީހުގެ ޖަލްސާގައި އެ ގަރާރަކީ ގަވައިދާ ހިލާފު ގަރާރެއް ކަމަށް ބުނެ ވަނީ ބޭރުކޮށްލައިފަ އެވެ. ރިޔާސަތުގައި އިންނެވި ވިލުފުށީ ދާއިރާގެ މެންބަރު ހަސަން އަފީފް އެގޮތަށް ނިންމަވައި މަޖިލިސް ނިންމާލެއްވީ އަމީންއާންމު އެކަމާ ދެކޮޅަށް ލަފާ ދެއްވަމުންދަނިކޮށެވެ. އޭގެ ފަހުން ބޭއްވި ޖަލްސާގެ ރިޔާސަތު ބެލެހެއްޓެވި ނައިބް ރައީސް އީވާ އަބްދުﷲ ވެސް ނިންމެވީ މަޖުލީހުގެ ޖަލްސާއެއްގައި ނަޝިދު އިތުބާރު ނެތް ކަމުގެ މައްސަލަ އެޖެންޑާއެއް ނުކުރެވޭނެ ކަމަށާއި އަލުން ހުށައަޅައިގެންނޫނީ ކުރިއަށް ނުދެވޭނެ ކަމަށެވެ.
