ގދ. ފަރެސްމާތޮޑާއިން ފުރައިގެން 14 ނޯޓިކަލް މޭލު ބޭރުން، 4 މީހުންނާއެކު ދަތުރުކުރި ލޭންޑިން ކްރާފްޓެއް ބަންޑުން ޖަހާލައިގެން މީހަކު ގެއްލިގެން ހޯދަން ފަށައިފިއެވެ. އެމްއެންޑީއެފުން މައުލޫމާތުދޭ ގޮތުގައި ’ލިއޯ ސަކްސަސް‘ ކިޔާ އެ ބާޖު ބަންޑުން ޖަހާލީ އޭގެ ބެޓެރީ ފެއިލްވެ ދިޔަގަނޑު ކޮންޓްރޯލް ނުވެގެންނެވެ. އޭގައި ތިބި ހަތަރު ފަޅުވެރިންގެ ތެރެއިން 3 ފަޅުވެރިން މިހާރުވަނީ އެމްއެންޑީއެފް ސަދަން އޭރިއާ ކޯސްޓްގާޑު ފޯތު ސްކޮޑްރަންގެ އެހީތެރިކަމާ އެކު މިއަދު ހަވީރު 4.10 ގައި ގދ. ވާދޫއަށް ގެންގޮސްފައެވެ. މި 3 ފަޅުވެރިން ސަލާމަތްކޮށްފައިވަނީ އެ ވަގުރު އެ ސަރަހައްދުން ދަތުރުކޮށްފައި ދިޔަ ގދ. ވާދޫ ސީވީޑު ދޯނިންނެވެ.
ގެއްލުނު ފަޅުވެރިޔާ ހޯދުމުގެ މަސައްކަތުގައި މިހާރުވެސް މޯލްޑިވްސް ޑިފެންސް ފޯސް ގެ ސަދަން އޭރިއާ ކޯސްޓުގާޑު ފޯތު ސްކޮޑްރަން ގެ ފާސްޓު އިންޓަސެޕްޓަރ ކްރާފްޓު ’މާފަތް‘ ދަނީ ހަރަކާތްތެރިވަމުންނެވެ. ގެއްލިފައިވާ ފަޅުވެރިޔާއާއި ބެހޭ އެއްވެސް މައުލޫމާތެއް މިހާތަނަށް ބާޖުގެ ވެރިފަރާތުންވެސް އަދި ކަމާބެހޭ އިދާރާތަކުން ހާމަކޮށްފައިނުވެއެވެ.
