މި އަހަރުގެ ރިޔާސީ އިންތިހާބު އިންތިޚާބު ކާމިޔާބު ކުރެއްވީ ޕީއެންސީގެ ކެންޑިޑޭޓް ޑރ. މުޙައްމަދު މުއިއްޒު ކަމަށް ވުމުން، އާ ސަރުކާރުގެ ކެބިނެޓު އެކުލަވާލައްވަނީ ވެސް މުއިއްޒު ކަމަށާއި ވަކި ފަރާތަކުން ހުށަހަޅާ ނަންތަކެއް އެކަމަށް ބޭނުންނުވާ ކަމަށް މުއިއްޒުގެ އިންތިގާލީ ކޮމިޓީގައި އިސްކޮށް ހުންނަވާ އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އިންތިޚާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި، ޕީއެންސީގެ ޗެއާޕާސަން ގެ މަގާމަށް ދާދިފަހުން ހަވާލުވި އަބްދުއްރަހީމް ވިދާޅުވީ ކެބިނެޓް އެކުލަވާލުމަކީ ގާނޫނު އަސާސީން ރައީސަށް ލިބިދޭ އިޚްތިޔާރެއް ކަމަށެވެ.
ޕީޕީއެމް ޕީއެންސީ ކޯލިޝަންގެ ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް، މުއިއްޒުގެ ކެބިނެޓަށް އައްޔަން ކުރަން ބޭނުންފުޅުވާ މީހުންގެ ލިސްޓެއް މުއިއްޒަށް ފޮނުއްވި ކަމަށް މައުލޫމާތު ލިބިފައިވާ ކަމަށް ބުނެ ނޫސްވެރިއަކު ކުރި ސުވާލަކާ ގުޅިގެން އަދުރޭ ވިދާޅުވީ ކެބިނެޓު އެކުލަވާލުމުގެ މަސައްކަތް ރައީސުލްޖުމްހޫރިއްޔާ ކުރައްވަމުންގެންދަވާނެ ކަމަށާއި، ’އެކަމަށް އިތުރު ބޭފުޅުން، އަޅުގަނޑުވިޔަސް އެހެން ބޭފުޅުން ވިޔަސް ’ލިސްޓު ހަދާފަ ފޮނުވަން. އެއީކީ އެކަން އޮންނަ ގޮތެއް ނޫންކަން ހަމަ ރަނގަޅަށް އެނގިވަޑައިގަންނަވާނެ ކަމަށެވެ.
އަބްދުއްރަހީމް ވިދާޅުވީ ރައީސް ޔާމީން އެފަދަ ލިސްޓެއް ފޮނުއްވި ކަމެއް ވެސް އަދި އެކަމާ ގުޅިގެން މުއިއްޒު ވަކި އެއްޗެކޭ ވިދާޅުވި ކަމެއް ވެސް މިހާތަނަށް އެނގިފައިނުވާ ކަމަށެވެ.
”އަޅުގަނޑު ގަބޫލުކުރާ ހަމައަކީ ރައްޔިތުން ހަވާލުކުރީ ކުރިއަށް އޮތް ފަސް އަހަރަށް ޑރ. މުއިއްޒާ. ޕީއެންސީ ކެންޑިޑޭޓް ޑރ. މުޙައްމަދު މުއިއްޒާ ހަވާލުކުރީ. އެެހެންވީމަ އެމަނިކުފާނު ރައްޔިތުން ކުރިމައްޗަށް ވަޑައިގަތީ، އެމަނިކުފާނު ރައްޔިތުންނަށް ވައުދުވެވަޑައިގަތީ، އެހެންވީމަ އެމަނިކުފާނު ވެވަޑައިގެންނެވި ވައުުދުތައް ފުއްދެވުމަށް އެމަނިކުފާނަށް އިތުބާރު އޮތް ބަޔަކާ އެކީގައި އެމަނިކުފާނަށް މަސައްކަތް ކުރެވޭނީ،“ އަބްދުއްރަހީމް ވިދާޅުވިއެވެ.
