ވައިގެ މަގުން ރާއްޖެ އައި ޕާކިސްތާނު މީހެއްގެ އަތުން ގިނަ އަދަދެއްގެ މަސްތުވާތަކެތި އަތުލައިގަނެފިއެވެ.
މޯލްޑިވްސް ކަސްޓަމްސް ސާވިސް އިން މިއަދު ނެރުނު ބަޔާނެއްގައި ބުނީ މި މަހުގެ ހަތް ވަނަ ދުވަހު ވައިގެ މަގުން ރާއްޖެ އައި ޕާކިސްތާނުގެ 20 އަހަރުގެ އަންހެން ޕަސިންޖަރެއްގެ ލަގެޖުން 4.720 ކިލޯގެ މަސްތުވާ ތަކެތި އަތުލައިގެންފައިވާ ކަމަށެވެ. އެ ތަކެތި ކަސްޓަމްސްއިން ކުރި ތަހުލީލުތަކުން ހެރޮއިންއަށް ޕޮޒިޓިވް ވެފައިވާ ކަމަށްވެސް ކަސްޓަމްސް ގެ ބަޔާނުގައި ހާމަކޮށްފައިވެއެވެ.
އެ އިދާރާއިން ބުނީ އަތުލައިގެން މަސްތުވާތަކެތީގެ މަގުމަތީ އަގު އުޅެނީ 5،800،000 ރުފިޔާގައި ކަމަށެވެ. އަދި އަތުލައިގެން މަސްތުވާ ތަކެއްޗާއި ފަސިންޖަރު ފުލުހުންނާ ހަވާލުކޮށްފައިވާ ކަމަށް ބުންޏެވެ.
މިދިޔަ މަހުވެސް 28 ވަނަ ދުވަހުވެސް ކަސްޓަމްއިން ވަނީ ހަތަރު ކިލޯގެ ހެރޮއިން އަތުލައިގެންފައެވެ. އެ ތަކެތީގެ މަގުމަތީ އަގުވެސް ފަސް މިލިއަނަށް އަރާ ކަމަށް ކަސްޓަމްސްއިން އޭރު ބުނެފައި ވެއެވެ. އެ ތަކެތި އަތުލައިގަތީ ދުބާއީއިން އައި އެއާކާގޯ ޝިޕްމެންޓަކުންނެވެ.
