ދިވެހި ބަހާއި ސަގާފަތާއި ބެހޭ މިނިސްޓްރީގެ އިސްވެރިން އެތަނުގެ މުއައްޒަފުންނަށް ބުލީކޮށް ފުރައްސާރަކުރާ މައްސަލައެއް ފެންމަތިވެ، އެ މައްސަލަ ބަލަން ފަށައިފިއެވެ.
ސިވިލް ސަވިސް ކޮމިޝަނަށް އެޑްރެސްކޮށް އެ މިނިސްޓްރީގެ 22 މުއަށްޒަފަކު ވަނީ ޕާމަނަންޓް ސެކްޓްރީއާއި އެ މިނިސްޓްރީގެ އިސްވެރިންގެ ޝަކުވާތަކެއް ހިމެނޭ ޕެޓިޝަނެއް ހުށައަޅާފައެވެ. މި ޕެޓިޝަނުގައި މައިގަނޑު ޝަކުވާތަކެއްގެ ގޮތުގައި ފާހަގަކޮށްފައިވަނީ މުއައްޒަފުން ތަފާތު ކުރުމާއި ބުލީކޮށް ފުރައްސާރަ ކުރާ މައްސަލައެވެ. މުރާސިލަށް މައުލޫމާތު ލިބިފައިވާ ގޮތުގައި އެތަނުގައި މަސައްކަތްކުރާ އިސްވެރިން ބައެއް މުއައްޒަފުންގެ ސިފައަށް މަލާމަތްކޮށް، އެމީހުންގެ ހަށިގަނޑު ހުންނަގޮތް ’ޖޯކެއް ގެ ގޮތުގައި ބޭނުން‘ ކުރެއެވެ.
މީގެ އިތުރުން ބައެއް މުއައްޒަފުންނާ ދިމާއަށް ’ހާދަ ފަލައޭ‘ ބުނުމާއި ބައެއް މުއައްޒަފުންނާ ދިމާއަށް ’ތީނަ ގުޅެނީ އަހަރުމެންނަށް ސައި ހަދާދޭ މީހަކަށް‘ ކަމަށް ބުނެ ފުރައްސާރަކޮށްފައިވެއެވެ. މީގެ އިތުރުން އޮފީހުގެ މުައްޒަފުންގެ ގޮތުގައި ނުހިމެނޭ ވެރިންގެ ރައްޓެހިންނަށް އޮފީހަށް ވަދެ ނިކުމެ އުޅުމުގެ ’އެކްސެސް‘ ދީފައި އޮތުމާއި އެމީހުންނަށް އެތަނުގެ މަސައްކަތްތަށް ހަވާލު ކުރުމާއި، ދުރާލާ އެންގުމެއް ނެތި ކުއްލިއަކަށް އިވެންޓުތަކެއް ބާއްޗަން ކަމަށް ބުނެ މުއައްޒަފުން އޮފީހަށް ނެރޭ މައްސަލަވެސް ފާހަގަކޮށްފައިވެއެވެ.
މި މައްސަލަތައް ސިވިލް ސަވިސް ކޮމިޝަނުން އަންނަނީ ބަލަމުންނެވެ.
