މި ސަރުކާރުން އިންތުހާބުގެ ތެރޭގައި ތަފާތު އެކި ފަހަރުމަތިން މަސްވެރިންނަށްވީ ވައުދު ނުފުއްދުނު ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މަސްވެރިންގެ ކަންބޮޑުވުންތައް ހިއްސާކޮށް، މާލެ ސަރަހައްދާއި ގދ. މަޑަވެލީގައި ކަންނެލި މަސްވެރިންގެ ޔޫނިއަނުން އިންތިޒާމުކޮށްގެން މިއަދު ފެށި މުޒާހަރާއާއި ގުޅިގެން ޝާހިދު ވިދާޅުވީ މަސްވެރިންގެ އަތުން ގަނެފައިވާ މަހަށް ދޭންޖެހޭ ފައިސާއަކީ މަސްވެރިންގެ ހައްޤެއް ކަމަށެވެ. އަދި، އެއީ މަސްވެރިންގެ ހައްޤަކަށްވުމުން އެ ހައްޤު ވަގުތުން އަދާކުރަމަށް ސަރުކާރަށް ގޮވާލެއްވިއެވެ. މި ގޮތުން ޝާހިދު ހަނދާންކޮށްދެއްވީ މިސަރުކާރުން މަސްވެރިންނަށްވީ އެއް ވައުދު ކަމަށްވާ، މަސްކިރާތާ 48 ގަޑިއިރު ތެރޭގައި ފައިސާ ޖަމާކޮށްދިނުމުގެ ވައުދެވެ. ޝާހިދު ތުހުމަތު ކުރެއްވި ގޮތުގައި މީގެ ކުރިން މި ސަރުކާރުން މަސްވެރިންނަށް ފައިސާ ދޫކޮށްފައިވަނީ ރައްޔިތުންގެ މަޖުލީހުގެ އިންތިހާބާއި ދިމާކޮށެވެ. އިންތިހާބެއް ނެތަސް މަސްވެރިންގެ ހައްގު އަދާކޮށްދިނުމަށާއި މިހާރު ކުރަމުންދާ މުޒާހަރާގައި މަސްވެރިންގެ ޝަކުވާ ތަކަށް ހައްލެއް ހޯދާދިނުމަށްވެސް ޝާހިދު ގޮވާލެއްވިއެވެ.
މަސްވެރިން ކިރި މަހަށް މިހާތަނަށް 80 މިލިއަން ރުފިޔާ ނުދެވި އެބަހުރި ކަމަށް މިފްކޯއިން އިއްޔެ ވަނީ ބުނެފައެވެ.
