ރައްޔިތުންގެ މަޖިލީހުގެ ދާއިމީ ކޮމިޓީތައް ކުރިއަށްގެންދިޔުމަށް ކަނޑައަޅާފައިވާ ހުރިހާ ކޮޓަރިތަކާއި މާލަންތައް ހިމެނޭ ތަންތަނުގައި ތަޅުލައި މެމްބަރުންނަށް ނުވަދެވޭ ގޮތް ހަދައިފިއެވެ.
ރައްޔިތުންގެ މަޖުލީހަށް ހުށައަޅާފައިވާ، އެ މަޖުލީހުގެ ރައިސް ކަމުން މުހައްމަދު ނަޝީދު ދުރުކުރުމުގެ މައްސަލައާއި، މަޖުލީހުގެ ނައިބްރައީސް ކަމުން އެމަނިކުފާނުގެ ކޮއްކޯފުޅު އީވާ އަބްދުﷲ ވަކި ކުރުމުގެ މައްސަލަވެސް ކުރިއަށް ނުގެންދެވިގެން މަޖުލީހުގެ އިދާރި މޭޒުން ހުއްޓުވާފައެވެ. ކޮމެޓީތަކަށް މެމްބަރުން ހަމަނުވާ ކަމަށް ބުނުމާއި ކޮމެޓީތައް އަލުން ހަދަން ޖެހޭނެ ކަމަށް ބުނެ މި ދެ މައްސަލަ އެޖެންޑާ ކުރަން ދެކޮޅު ހަދަމުންދަނީ ރައްޔިތުންގެ މަޖުލީހުގެ އަމީން އާއްމު ފާތިމަތު ނިއުޝާއެވެ. މި މައްސަލާގައި އެ ފަރާތުން ފާހަގަކުރާ ޕޮއިންޓުތަކަށް މަޖުލީހުގެ މެޖޯރިޓީ ލީޑަރާއި އަދި ބައެއް ގާނޫނީ ބޭފުޅުންގެ ހިޔާލުވެސް ތަފާތެވެ. އެ ބޭފުޅުން ވިދާޅުވަނި މަޖުލީހުގައި ދާއިމީ ކޮމެޓީތައް އޮންނާނެ ކަމަށާއި އެއްވެސް ކޮމެޓީއެއް މަރުތަޅުއަޅުވާފައި ނުބޭއްވޭނެ ކަމަށެވެ.
ކޮމެޓީތައް ބޭއްވުމަށް މަޖުޅިހުގެ އަމީންއާއްމަށް ދެންނެވުމުންވެސް އެފަރާތުންވަނި މަޖުލީހުގެ މެމްބަރުންނަށް އެއްބާރުލުން ނުދީފައެވެ. މި މައްސަލަ ހޫނުވެފައިވަނިކޮށް މިއަދު ވަނީ މަޖުލީހުގެ ކޮމެޓީތައް ބާއްވާ ކޮޓަރިތަކުގެ ތަޅު ބަދަލުކޮށް، ތަޅުލައި އެއްވެސް މެމްބަރަކަށް ނުވަދެވޭގޮތް ހަދާފައެވެ.
ރައްޔިތުންގެ މަޖިލީހުގެ މަސްއޫލިއްޔަތުތަކާއި ބާރުތައް އެ މަޖިލީހުގެ ގަވާއިދުގައި ބަޔާންކޮށްފައިވާއިރު މަޖިލީހުގެ އިމާރާތް ކޮންޓްރޯލް ކުރުން ނުވަތަ މަޖިލީހުގެ ގޯއްޗާއި އިމާރާތަކީ މަޖިލިސް ރައީސްގެ ބާރުގެ ދަށުގައިވާ ތަންތަން ކަމަށް ބަޔާންކޮށްފައިވެ އެވެ.
ރައްޔިތުންގެ މަޖުލީހުގެ މެމްބަރުން ތުހުމަތުކުރާ ގޮތުގައި ނަޝީދު ވަކިކުރުމުގެ މައްސަލައާއި، ނަޝީދާއި އެމްޑީޕީ އަދި ރައީސް ސޯލިހާއި ޖެހިފައިވާ މައްސަލާގައި މަޖުލީހުން ގަވައިދާ ހިލާފަށް ހިންގާ ހުރިހާ ކަމަކަށް އެއްބަރުލުންދެނީ މަޖުލީހުގެ އަމީންއާއްމު ނިއުޝާއެވެ. މިއީ ރައްޔިތުންގެ މަޖުލީހުގެ ހަޔާތުގައި ދުވަަހަކުވެސް އާއްމުންނަށް ފެނުނު މަންޒަރެއްނޫނެވެ. އާއްމު ރައްޔިތުންގެ ކަންބޮޑުވުމަކީ ރައްޔިތުންގެ ފައިސާއިން އެތައް އިސްރާފެއް ކުރަމުން ހުރިހާ ބިލެއް ހުއްޓުވާލައިގެން ތިބެ ވަކި މީހެއްގެ ސިޔާސީ ހަޔާތަށްޓަކައި މުޅި މަޖްލިސް މަރުތަޅުއަޅުވައިގެން އުޅޭތީއެވެ.
