ރައްޔިތުންގެ މަޖުލީހުގެ ރައީސް މުހައްމަދު ނަޝީދު، މަޖުލީހުގެ ރައީސްކަމުން ދުރުކުރުމަށް 54 މެމްބަރުންގެ ސޮޔާއެކު މަޖުލީހަށް ހުަށައެޅުމުންވެސް، ރައީސް ވަކި ކުރުމުގެ މައްސަލައާއި އެކަމާ ގުޅޭ އެއްވެސް ކަމެއް ކުރިއަށް ގެންދަން ރައްޔިތުންގެ މަޖުލީހުގެ އަމީންއާއްމު (ސެކެޓްރީ ޖެނެރަލް) ފާތުމަތު ލިއުޝާ ދެކޮޅު ހަދައިފިއެވެ. މުރާސިލަށް މައުލޫމާތު ދެއްވި މެމްބަރަކު ހާމަކުރެއްވިގޮތުގައި މިހާރު މަޖުލީހުގެ ޖަލްސާތަކުގެ ޑެޑްލޮކާއި އެޖެންޑާ ކުރުމުގެ ކަންތަކުގައިވެސް އަމީންއާއްމު ގެ ނިންމުން ހުންނަނީ ސީދާ މަޖުލީހުގެ ގަވައިދާ ހިލާފަށެވެ.
މަޖްލިސް ޑެޑްލޮކް ވެފައިވާ އެންމެ ބޮޑު އެއް މައްސަލައަކީ ކޮމެޓީތަކަށް މެމްބަރުން އައްޔަން ކުރުމުގެ މައްސަލައެވެ. އެމްޑީޕީ ގެ ޕާލަމެންޓްރީ ގްރޫޕުގެ ރައީސް މުހައްމަދު އަސްލަމް ވިދާޅުވަނީ މަޖުލީހުގެ ކޮމެޓީތައް އަބަދުވެސް އޮންނާނެ ކަމަށެވެ. މަޖުލީހުގެ އަމީން އާއްމު ގަބޫލުކުރާ ގޮތުގައި މިހާރުވަނީ ކޮމެތީތައް އުވިފައެވެ. އެއީ ދާދިފަހުން އުފެއްދި ނަޝިދުގެ ޑިމޮކްރެޓްސް ޕާޓީއަށް މަޖުލީހުގެ 12 މެމްބަރުން ސޮއިކުރެއްވުމާ ގުޅިގެންނެވެ.
މިއަދު ޖަލްސާއަށް ކުރިން އެޖެންޑާ ކުރި މަޖުލީހުގެ ނައިބް ރައީސްކަމުން އީވާ ވަކި ކުރުމުގެ މައްސަލަވެސް އެންމެ ފަހުން އަމީން އާއްމު އަންގަވައިގެން ވަނީ އެޖެންޑާއިން ނަގާފައެވެ. އެއީ މަޖުލީހުގެ ކޮމެޓީތައް ނެތް ކަމަށް ބުނެއެވެ. ހާއްސަކޮށް އާއްމު ކޮމެޓީގެ މައްސަލާގައެވެ.
އާއްމު ކޮމެޓީގެ ބައްދަލުވުން ބޭއްވުމަށް ރައްޔިތުންގެ މަޖުލީހުގެ މެޖޯރިޓީ ލީޑަރު އެދިވަޑައިގަތުމުންވެސް އަމީންއާއްމުވަނީ އެ ކޮމެޓީގެ ބައްދަވުންވެސް އިންތިޒާމުކޮށްނުދީ، އެކަމަށްވެސް ހުރަސްއަޅުއްވާފައެވެ.
މީގެ ކުރީގެ ރައްޔިތުންގެ މަޖްލިސްތަކުގައި މުޅިންވެސް ދިމާވަނީ މަޖުލީހުގެ ރައީސް ހިންގާ ގޮތުން މަޖުލީހުގެ ނިޒާމު ގެއްލި މަރުތަޅު އެޅޭ މައްސަލައެވެ. މަޖުލީހުގެ ރައީސަކަށް ހޮވެނީވެސް ސިޔާސީ ބޭފުޅަކަށްވެފައި ސިޔާސީ ގޮތުން ހިޔާލުތަފާތުވާ ހާލަތްތަކުގައި މިކަން އެތައް ފަހަރަކު ހިނގާފައިވެއެވެ.
ނަމަވެސް މަޖުލީހުގެ އަމީންއާއްމު (ސެކެޓްރީ ޖެނެރަލް) ފާޅުގައި ސިޔާސީ ގޮތުން ވަކި ކޮޅެއް ނެންގެވި މިއީ ފުރަތަމަ ފަހަރެވެ.
ތިޔަ**ވެސް މަޤާމުން ދުރުކޮށްބަލަ ކޮންފަދަބަލާއެއް ހަނޑިސޮރުފަރާތުން