ލ،ގަމުގައި އިންޓަނޭޝަނަލް މެންޓަލް ހޮސްޕިޓަލެއް އަޅައި، އެ ހޮސްޕިޓަލް މެޑިކަލް ޓުއަރިޒަމްއާއި ގުޅުވާލާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ހައްދުންމަތީގެ ރަަށްތަކަށް ކުރައްވަމުން ގެންދަވާ ރަސްމީދަތުރުފުޅުގެ ތެރެއިން ގަމުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ރާއްޖޭގެ 4 ސަރަހައްދެއްގައި ޓާޝަރީ ހޮސްޕިޓަލުތަކެއް ތަރައްގީކުރަން މަސައްކަތްކުރަމުންދާ ކަމަށާއި މި ގޮތުން ލ.ގަމު ހޮސްޕިޓަލަކީ އެގޮތުން ތަރައްގީ ކުރާނެ އެއް ހޮސްޕިޓަލުކަމަށެވެ. އެ ހޮސްޕިޓަލު ތަރައްގީ ކުރާއިރު އިންޓަނޭޝަނަލް މެންޓަލް ހޮސްޕިޓަލާއި މެޑިކަލް ޓުއަރިޒަމްވެސް ލ.ގަމުގައި ފެށިގެންދާނެ ކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ ރިޔާސީ އިންތިހާބުގެ ތެރޭގައި ގަމުގެ ތަރައްގީއަށް ގިނަ ވައުދުތަކެއް ވެވަޑައިގެންފައިވާނެ ކަމަށާއި އަދި ރަސްމީކޮށް ސަރުކާރުގެ ސިޔާސަތުތަކުގެ ތެރޭގައި އެކަންކަން މިހާރު ހިމަނުއްވާފައިވާނެ ކަމަށެވެ. އަދި އެކަންކަން ކުރުމަށްޓަކައި މަސައްކަތްތައް އެކި މަރުހަލާފައި ފެށިގެން ގޮސްފައިވާ ކަމަށާއި ގަމު ތަރައްގީ ކުރުމުގައި އަމަލީ ގޮތުން ނަތީޖާ ނެރެދެއްވާނެ ކަމަށް ރައީސް ވިދާޅުވިއެވެ.
