ކޮވިޑް-19 ގެ ތެރޭގައި ލޯކަލް ކައުންސިލްތަކުގެ އިންތިހާބު ބޭއްވުމަށް ކެމްޕޭން ކުރުމުގައި އަމަލުކުރުމަށް އެޗްޕީއޭ އިން ކަނޑައެޅި އުސޫލު އިސްލާހުކޮށް، ކަރަންޓީނު ނުވެ ކެމްޕޭނަށް ރަށްރަށަށް ދެވޭ ގޮތަށް ގެނައި ބަދަލު އުވާލައިފި އެވެ.
އެޗްޕީއޭއިން ދެންމެ ކުރި ޓުވީޓެއްގައި ހާމަކުރގޮތުގައި އުވާލާފައިވަނީ ކޮވިޑް-19 ގެ ހާލަތުގައި ރައްކައުތެރިކަމާއެކު ލޯކަލް ކައުންސިލްތަކުގެ އިންތިޚާބު ކުރިޔަށް ގެންދިޔުމުގެ އުސޫލުގެ 12 ވަނަ މާއްދާއަށް ގެނައި އިސްލާހެވެ.
އިއްޔެ އިއުލާންކުރި އިސްލާހުގައި، ކެމްޕޭނުގެ ހަރަކާތްތައް ކުރިޔަށް ގެންދިޔުމަށް، އެއް ރަށުން އަނެއް ރަށަށް ދަތުރު ކުރާންވާނީ، ހެލްތް ޕްރޮޓެކްޝަން އެޖެންސީން އެ ކަމަށް ކަނޑައަޅައި އާންމުކުރާ ޚާއްޞަ ގައިޑްލައިނާ އެއްގޮތްވާ ގޮތުގެ މަތީންކަމަށް ބަޔާންކޮށްފައިވެއެވެ. އަދި، ކަރަންޓީނު ނުވެ ދަތުރުކުރެވޭ ގޮތަށް ހަމަޖެއްސިއެވެ.
މިގޮތަށް އެޗްޕީއޭ އިން ގައިޑްލައިނަށް ގެނައި ބަދަލުތަކާއި ގުޅިގެން އާންމުންގެ ގިނަ ބަޔަކު ވަނީ ހިތްހަމަ ނުޖެހި ނުރުހުން ފާޅުކޮށްފައެވެ. އެގޮތުން، މިއީ ސިޔާސީ ފަރާތްތަކުން އެޗްޕީއޭ އަށް ނުފޫޒު ފޯރުވުން ކަމަށާއި، އެކަމުގެ ސަބަބުން ރަށްރަށަށް ބަލި ފެތުރޭނެ ކަމަށްވެސް ގިނަ ބަޔަކު ވަނީ ބުނެފައެވެ.
އާންމުންގެ އިތުރުން އެތައް ޑޮކްޓަރުންނެއް ވެސް ވަނީ ބަލި ފެތުރިފައިވާ ރަށްރަށުން ބަލި ނެތް ރަށްރަށަށް ގޮސް ކަރަންޓީނު ނުވެ އުޅެވޭ ގޮތަށް ގެނައި އިސްލާހަށް ފާޑުކިޔައި އެކަން ބަދަލުކުރުމަށް ގޮވާލައިފަ އެވެ.
ކަރަންޓީނު ނުވެ ފަސް ދުވަހަށް ވުރެ ކުރު މުއްދަތަކަށް ރަށްރަށަށް ގޮސް ކެމްޕޭނު ކުރެވޭ ގޮތަށް އުސޫލު ބަދަލުކުރީ ކެމްޕޭނުކުރަން ފުރުސަތު ނުލިބޭ ކަމަށް ބުނެ ޕާޓީތަކާއި އިލެކްޝަންސް ކޮމިޝަނުން ކުރި ޝަކުވާތަކަށް ފަހުގަ އެވެ. އެކަމަކު އާންމުންގެ އެތައް ބަޔަކު ބަންދުވެފައި ތިއްބާ ސިޔާސީ ބޭނުމަށް ރަށްރަށް ދާން ހުއްދައެއް ލިބުމުން އެކަމަށް ވަރަށް ބޮޑަށް ފާޑުކިޔުން އަމާޒުވި އެވެ.
އެޗްޕީއޭ އިން ބުނީ މި ބަދަލު އުވާލީ އާންމުންގެ ގިނަ ކަންބޮޑުވުންތަކެއް ހުރުމުން ކަމަށެވެ.
