ކޮވިޑް19ގެ ހާލަތާ ގުޅިގެން މާލެ ސަރަހައްދުގައި އަޅާފައިވާ ފިޔަވަޅު ތަކާ ހިލާފަށް ދަތުރުކުރި 95 މީހަކު ޖުރިމަނާ ކޮށްފިއެވެ.
ފުލުހުން މިއަދު ހާމަކޮށްފައިވާ ގޮތުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ހުއްދައާއި ނުލައި ރޭގެ ވަގުތެއްގައި ވ. އަންބަރާއަށް ދަތުރުކުރި 95 މީހަކު ވަނީ ޖޫރިމަނާކޮށްފައެވެ. އަދި އެ މީހުން ދަތުރުކުރި އުޅަނދަށް އެރުވޭ އަދަދަށްވުރެ ގިނައިން މީހުން އަރުވާފައިވާ ކަމަށް ވެސް ފުލުހުން ވަނީ ހާމަކޮށްފައެވެ.
މިކަމާއި ގުޅިގެން ބަލަންޖެހޭ ކަންކަން ބަލައި މައްސަލަ އިތުރަށް ތަހުގީގުކުރަމުން އަންނަ ކަމަށް ފުލުހުން ވަނީ ބުނެފައެވެ. މި މައްސަލައާ ގުޅިގެން އިތުރު މައުލޫމާތެއް ފުލުހުން ހާމަކޮށްފައެއް ނުވެއެވެ.
ވ. އަންބަރާ އިން މީގެ ކުރިންވެސް ވަނީ ގިނަ އަދަދެއްގެ ބަޔަކު ޕާޓީކޮށް މަސްތުވާތަކެއްޗާއެކު ހައްޔަރުކޮށްފައެވެ. ނަމަވެސް ފަހުން އެމައްސަލައިގެ އިތުރު ތަފްސީލެއް ހާމަކޮށްފައި ނުވެއެވެ. އަދި އެފަރާތްތަކަށް ދައުވާކޮށްފައިވެސް ނުވެއެވެ.
ކޮވިޑް-19 ފެތުރުން ހުއްޓުވުމުގެ ގޮތުން އެޗްޕީއޭއިން ކަނޑައަޅާފައިވާ ގައިޑްލައިންތަކަށް ފުރިހަމައަށް ތަބާވުމަށް ފުލުހުން ވަނީ އިލްތިމާސްކޮށްފައެވެ.
އެޗްޕީއޭއިން ވަނީ ކޮވިޑް ފެތުރުން ކޮންޓްރޯލްކުރުމުގެ ގޮތުން މާލެ ސަރަހައްދުގައި ފަސް މީހުންނަށް ވުރެ ގިނަ މީހުންނަށް އެއްނުވެވޭ ގޮތަށް ވެސް ގައިޑްލައިންތަކެއް ކަނޑައަޅާފައެވެ. އަދި ޕާޓީތައް ބޭއްވުމާއި އެއްވުންތައް ބޭއްވުން ވެސް މަނާކޮށްފައިވާއިރު ރަށްރަށަށް ދަތުރުކުރުމުގެ ކުރިން އެ އޭޖެންސީގެ ހުއްދަ ވެސް ނަގަން ޖެހެއެވެ.
