ސޯސަލް މީޑިއާ އެކްޓިވިސްޓެއް ގޮތުގައި މަސައްކަތްކުރާ އަހުމަދު އަންވަރު (ސިމްވާރު) ސްރީލަންކާގައި ހުންނަ ދިވެހި އެމްބަސީގެ އިސް މަގާމަކަށް އައްޔަން ކޮށްފިއެވެ.
ރައީސް ޔާމީނުގެ ވެރިކަމުގައި ސަރުކާރަށް ފާޑުކިޔައި، އެމްޑީޕީގެ އެކްޓިވިސްޓެއްގެ ގޮތުގައި ސަމާލުކަން ލިބުނު ސިމްވާރު، ރައީސް ޔާމީނުގެ ވެރިކަމުގެ ފަހުކޮޅު އަމިއްލައަށް އަރުވާލެވިގެން ހުރީ ލަންކާގައެވެ. އެ ދުވަސްވަރު ޝިމްވާރު ތުހުމަތު ކުރަމުންދިޔައީ އޭނާ ހައްޔަރުކޮށްފާނެ ކަމުގެ ބިރަށް ރާއްޖެ ދޫކޮށް ލަންކާއަށް ބަދަލުވީ ކަމަށެެވެ. ރައީސް ޔާމީނާއި ޕީޕީއެމް އަދި ޕީއެންސީއަށް ވަރަށް ބޮޑަށް ފާޑުކިޔަމުންއައި ސިމްވާރު މި ފަހުން ސިޔާސީ މަސައްކަތް ކުރަމުން ދިޔައީ ނަޝީދުގެ ޑިމޮކްރެޓްސް ޕާޓީގައެވެ.
އެމްޑީޕީއާއި ޑިމޮކްރެޓްސްގައި ސިޔާސީ އެކްޓިވިސްޓުންގެ ގޮތުގައި މަސައްކަތް ކުރަމުންއައި ބައެއް ފަރާތްތަކަށް އަންނަނީ މި ސަރުކާރުން ސިޔާސީ މަގާމުތައް ދެމުންނެވެ. މި ގޮތުން ތޮއްޔިބު ޝަހީމަށް ސްޓެލްކޯއިން ވަނީ މަތީ މަގާމެއް ހަމަޖއްސާފައެވެ. ލޫކަސް ޖަލީލާއި ފަދަ އެކްޓިވިސްޓުންނަށްވެސް ވަނީ ޑެޕިއުޓީ މިނިސްޓަރު ފެންވަރުގައި މަގާމުތަކަށް ހަމަޖައްސާފައެވެ. މީގެ ތެރެއިން ބައެއް އެކްޓިވިސްޓުން އޮފީހަށް ނިކުމެ މަސައްކަތް ކުރަން ނުޖެހޭ ކަމަށްވެއެވެ.
އަހުމަދު އަންވަރު (ސިމްވާރު) ގެ މަގާމު ކަމަށްވާ އެމްބަސީގެ ސެކަންޑު ސެކެޓްރީގެ މުސާރައާއި އިނާޔަތް އަދި ކެއުމާއި ހުރުމުގެ ހަރަދަށް 67،962 ރުފިޔާ ދައުލަތުން މަހަކަށް ހަރަދު ކުރެއެވެ. ލަންކާ އެމްބަސީގެ ފަސްޓު ސެކެޓްރީއަކަށް އައްޔަންކޮށްފައިވަނީ ފިލްމީ ތަރި އަލީ ސީޒަންއެވެ.
