މަސްވެރިންގެ އަތުން ސަރުކާރުން މަސްގަންނަ އަގު ދަށްކޮށްފިއެވެ.
މީގެ ކުރިން ސަރުކާރުން 25 ރުފިޔާއަށް ގަންނަމުން އައި މަސް ކިލޯއެއް މިއަދުން ފެށިގެން ވަނީ 20 ރުފިޔާއަށް ދަށްކޮށްފައެވެ. ރައްޔިތުންގެ މަޖުލީހުގައި ފިޝަރިޒް މިނިސްޓަރ އަހުމަދު ޝިޔާމާއި ސުވާލުކުރުމުން ވިދާޅުވީ މަސްވެރިންގެ އަތުން ބޮޑު އަގުގައި މަސް ގަންނަ ނަމަ އެކަން ވާނީ ދައުލަތަށް ވަރަށް ބޮޑު ބުރައަކަށެވެ. އެހެން ކަމުން ދައުލަތުގެ ހަރަދުތައް ކުޑަ ކުރުމަށް މިހާރުވާނީ މަސްވެރިންގެ އަތުން މަސް ގަންނަ އަގު ކުޑަކޮށްފައެވެ. ޝިޔާމު ތުހުމަތު ކުރެއްވި ގޮތުގައި ކުރީ ސަރުކާރުން މަސްވެރިންގެ އަތުން ބޮޑު އަގުގައި މަސް ގަންނަމުން އައީ ސިޔާސީ ބޭނުމެއްގައި ކަމަށެވެ. ނަމަވެސް މި ސަރުކާރުގެ ވިސްނުންހުރީ މިފްކޯއަށް ގެއްލުން ނުވާ ގޮތަށް ދެމެހެއްޓެނިވި ގޮތެއްގައި މަސްވެރިންނަށް ފައިސާ ދެވޭނެ އަގެއްގައި މަސްގަތުމަށެވެ. މިނިސްޓަރު ވިދާޅުވީ މަސްވެރިންގެ އަތުން ބޮޑުއަގުގައި މަސް ގަންނަ ނަމަ ދައުލަތުގެ ބަޖެޓު ބޮޑުތަނުން ދަރާނެ ކަމުގެ ބިރު އެބައަޮތް ކަމަށެވެ. މިއަހަރު ދައުލަތުގެ ބަޖެޓުން ސަބްސިޑީގެ ގޮތުގައި ހަމަޖެހިފައިވާ ފައިސާއިންވެސް އެކަން ނުވާނެ ކަމަށް މިނިސްޓަރ ވިދާޅުވިއެވެ.
މަސްވެރިންނަށް ދޭން ޖެހޭ ފައިސާ ނުދިނުމުގެ މައްސަލާގައި ރައްޔިތުންގެ މަޖުލީހަށް ވަނީ ކުއްލި މައްސަލައެއްވެސް ހުށައަޅާފައެވެ. މީގެ އިތުރުން މަސްވެރިން އަންނަނީ މި ކަމާ ދެކޮޅަށް އަޑު އުފުލާ އިޖުތިހާދު ކުރަމުންނެވެ. މަސްވެރިންގެ ކަންބޮޑު ވުމަކީ ދައުލަތުގައި ފައިސާނެތް ކަމަށް ބުނެ ހަރަދު ކުޑަކުރަން ކަމަށް ބުނެ، މަސްވެރިންނަށް ފައިސާ ނުދިނުމާއި އަދި މަސް ގަންނަ އަގު ދަށް ކުރުމަށް ފަހު ސިޔާސީ މަގާމުތަކަށް ހަރަދު ކުރުން ކުޑަ ނުކުރާތީއެެވެ.
