އެމްޑީޕީ ދޫކޮށް ރިޔާސީ އިންތިހާބު ކާމިޔާބު ކުރި ޑރ.މުއިއްޒު ނިސްބަތްވާ ޕީއެންސީއަށް ސޮއިކުރި ވާހަކައަކީ ދޮގެއް ކަމަށާއި، މިހާތަނަށް ހަމައެކަނި ސޮއިކުރި ޕާޓީއަކީ އެމްޑީޕީ ކަމަށާއި އެ ޕާޓީގައި މިހާރުވެސް މިހިރީ ގަދަކޮށް ކަމަށް މެމްބަރު ގަފޫރު ވިދާޅުވެއްޖެއެވެ. ބައެއް މީޑިއާތަކުންނާއި ޑިމޮކްރެޓްސްއަށް ނިސްބަތްވާ މެމްބަރުންނާ ހަވާލާދީ ހަނިމާދޫ ދާއިރާގެ މެމްބަރު ގަފޫރު ޕާޓީބަދަލުކުރި ކަމަށް ވާހަކަ ދެކެވުމުން، ގަފޫރު ނިސްބަތްވާ އެމްޑީޕީންވެސް ވަނީ އެ ވާހަކަ ދޮގުކޮށްފައެވެ.
އިންތިހާބީ ރައީސް ޑރ. މުއިއްޒު ހުވާކުރެއްވުމަށް ފަހު ޕީއެންސީ ވަރުގަދަ ކުރުމުގެ ގޮތުން މަޖުލީހަށް ނިސްބަތްވާ މެމްބަރުންނާއި އާއްމު މެމްބަރުން އިތުރު ކުރުމުގެ މަސައްކަތް ފަށާނެ ކަމަށް ޕީއެންސީގެ ބައެއް އޮފިޝަލުން ދަނީ ބުނަމުންނެވެ. މަޖުލިސް މެމްބަރުންގެ ތެރޭގައި އެމްޑީޕީއާއި ޕީޕީއެމް މެމްބަރުންވެސް ހިމެނޭ ކަމަށް ބައެއް ފަރާތްތަކުން މައުލޫމާތު ދެއެވެ.
ރައްޔިތުންގެ މަޖުލީހުގެ އިންތިހާބު ފެށެން ގާތްގަނޑަކަށް ތިންމަސްދުވަސް އޮތްއިރު އަލަށް ސޮއިކުރާ މެމްބަރުންގެ މާބޮޑު ބޭނުމެއް އެއްވެސް ޕާޓިއަކަށް އެހާ މުހިއްމު ނުވާނެ ކަމަކަށް ސިޔާސީ ދާއިރާގެ ފަރާތްތަކުން ދަނީ ބުނަމުންނެވެ.
