މާލޭ ރެސްޓޯރެންޓެއްގެ ތެރޭގައި އަންހެނަކަށް ހަމަލާދީ މަރާމާރި ހިންގުމަށް ފަހު މަރުގެ އިންޒާރުދިން ފުލުހަކަށް ދައުވާ ކުރުމަށް ޕްރޮސެކިއުޓަރ ޖެނެރަލުގެ އޮފީހަށް ފޮނުވައިފިއެވެ.
މި މައްސަލާގައި އަނިޔާ ލިބުނު އަންހެން މީހާ މުރާސިލަށް މައުލޫމާތުދެމުން ބުނީ މިދިޔަ އަހަރުގެ ޑިސެމްބަރު މަހު މާލޭ ރެސްޓޯރެންޓެއްގެ ތެރޭގައި މި މީހާ (އަހުމަދު ޝިފާއު) ވަނީ އަންހެން މީހާގެ ކަރުގައި ހިފާ މާރާމާރީ ހިންގާފައެވެ. މީގެ އިތުރުން އެ އަންހެންމީހާ އަށް އެކި ވަރުގެ ޖިސްމާނީ އަނިޔާ ކުރާނެ ކަމަށާއި މަރާލާނެ ކަމަށްވެސް އޭނާ ވަނީ ބުނެފައެވެ. މި އިންޒާރުދޭ ފޯނު ރެކޯޑިންއެއް މިހާރު އަންނަނީ ސޯސަލް މީޑިއާގައި ދައުރުވަމުންނެވެ.
މި މައްސަލާގައި ހިމެނޭ ފުލުސް އޮފިސަރުގެ މައްސަލަ ފުލުހުން ތަހުގީގުކޮށް ފިޔަވަޅު އަޅާނެ ކަމަށް މީގެ ކުރިން ފުލުހުންވަނީ މީޑިއާއަށް މައުލޫމާތުދީފައެވެ. ނަމަވެސް މިހާރުވެސް އޭނާ ފުލުހުންގެ ވަޒީފާއަށް ބަރާބަރަށް ނުކުންނަމުންދާ ކަމަށްވެއެވެ.
މިއަދު މިމައްސަލައިގައި އަނިޔާ ލިބުނު އަންހެން މީހާއަށް ފުލުހުން ފޮނުވި ލިއުމުގައި ބުނެފައިވަނީ މޯލްޑިވްސް ޕޮލިސް ސަރވިސްއިން ތަހުގީގުކޮށް އެ މައްސަލަ ފީޖީ އޮފީހަށް ދައުވާ ކުރުމަށް ފޮނުވާފައިވާ ކަމަށެވެ.
އަހުމަދު ޝިފާއު މަރުގެ އިންޒާރު ދިނުމުން، މި އަންހެންމީހާ ބުނެފައިވަނީ އެ ދުވަހުން ފެށިގެން އޭނާ ހުންނަނީ ނަފްސާނީ ގޮތުން ވަރަށް ބޮޑު ބިރުވެރިކަމެއްގެ ތެރޭގައި ކަމަށާއި، ޝިފާއުއަކީ އެފަދަ ކަމެއް އެއްވެސް ޖެހިލުމެއް ނެތި ކޮށްފާނެ ފަދަ މީހެއްކަމަށެވެ. މި ގޮތުން މީގެ ކުރިންވެސް އެކި ވަރުގެ އިންޒާރާއި އަނިޔާތައް އޭނާގެ ފަރާތުން ލިބިފައިވާތި އަބަދުވެސް ހުންނަނީ ވަރަށް ބޮޑު ބިރުވެރިކަމެއްގެ ތެރޭގައި ކަމަށެވެ.
