ރާއްޖެ އާއި ޔޫރަޕިއަން ޔޫނިއަންއާ ދެމެދު ބާއްވާ ހަތަރުވަނަ ސީނިއަރ އޮފިޝަލްސް ބައްދަލުވުމުގައި ބައިވެރިވާ ރާއްޖޭގެ ވަފުދު ބެލްޖިއަމްގެ ބްރަސަލްސްއަށް މިއަދު ފުރައިފިއެވެ.
ކޮންމެ އަހަރަކު ބާއްވަމުން އަންނަ ސީނިއާ އޮފިޝަލުންގެ ބައްދަލުވުމަކީ ރާއްޖެއާއި ޔޫރަޕިއަން ޔޫނިއަންއާ ދެމެދު ދެފުށް ފެންނަ އަދި ރަނގަޅު ގުޅުމެއް އުފައްދައި، އެކުވެރިކަމާއި އެއްބާރުލުމުގެ ގުޅުން އިތުރަށް ބަދަހިކުރުމަށް މަގުފަހިކޮށްދޭ ޕްލެޓްފޯމެކެވެ.
ފޮރިން މިނިސްޓްރީން މައުލޫމާތިު ދޭ ގޮތުގައި މިމަހުގެ 13ވަނަ ދުވަހު ބެލްޖިއަމްގެ ބްރަސަލްސްގައި ބޭއްވުމަށް ހަމަޖެހިފައިވާ މި ބައްދަލުވުގެ އެޖެންޑާގައި އީޔޫ އާއި ރާއްޖޭގެ ތަރައްޤީ އާއި، ޕޯސްޓް-ކޮޓޯނޯ އެގްރީމަންޓާއި، ގަވަނަންސް، ޑިމޮކްރަސީއާއި، އިންސާނީ ޙައްޤުތަކާއި، ޤާނޫނީ ވެރިކަން، ހަރުކަށި ފިކުރާއި ޓެރަރިޒަމާ ދެކޮޅަށް މަސައްކަތްކުރުން ހުއްޓުވުން ހިމެނެއެވެ.
އަދި އިގްތިސާދީ އަދި ވިޔަފާރީގެ ދާއިރާއިން އެއްބާރުލުން ދިނުމާއި، ތިމާވެއްޓާއި މޫސުމަށް އަންނަ ބަދަލުތަކާއި، މަސްވެރިކަމާއި، ޝެންގެން ވިސާ ފެސިލިޓޭޝަން، އދ.ގައި އެއްބާރުލުން ދިނުމާއި، ސަރަޙައްދީ ތަރައްޤީއާއި، ސަރަޙައްދީ ކުރިއެރުންތަކާއި ބެހޭގޮތުން މަޝްވަރާކުރުންވެސް ހިމެނެއެވެ.
ރާއްޖޭގެ ވަފުދުގައި ފޮރިން މިނިސްޓްރީގެ ސީނިއަރ އޮފީޝަލުންނާއި، ރައީސް އޮފީހާއި، އިކޮނިމިކް މިނިސްޓްރީ، މިނިސްޓްރީ އޮފް ފިޝަރީޒް އެގްރިކަލްޗަރ އެންޑް މެރިން ރިސޯސަސް، މިނިސްޓްރީ އޮފް އެންވަރމަންޓު އެންޑް ކުލައިމެޓް ޗޭންޖު، މޯލްޑިވްސް ޕޮލިސް ސަރވިސް އަދި ނެސެނަލް ކައުންޓަރ ޓެރެރިޒަމް ގެ ފަރާތުން އޮފިޝަލުން ބައިވެރިވެެ ވަޑައިގަންނަވައެވެ. މި ވަފުދުގައ އިސްކޮށް ހުންނަވާނީ މިނިސްޓަރ އޮފް ސްޓޭޓް ފޮރ ފޮރިން އެފެއާޒް އަޙްމަދު ޚަލީލް އެވެ. ޔޫރަޕިއަން ޔޫނިއަންގެ ވަފުދުގައި އިސްކޮށް ހުންނަވާނީ ޔޫރަޕިއަން އެކްސްޓާނަލް އެކްޝަން ސާވިސްގެ ޑެޕިއުޓީ މެނޭޖިން ޑިރެކްޓަރު ޕައޯލާ ޕަމްޕަލޯނީ އެވެ.
މި ދަތުރުގައި ދުނިޔޭގެ ޖަމިއްޔާތަކުގެ އިސް ބޭފުޅުންނާއި، އީޔޫގެ އިސް ބޭފުޅުނާ ވެސް ރާއްޖޭގެ ވަފުދު ގެ ބޭފުޅުން ބައްދަލު ކުރައްވާނެއެވެ.
