ކުޅުދުއްފުށި ސިޓީ ހޮސްޕިޓަލުގައި ޒަމާނީ އައިސިޔޫގެ ހިދުމަތް ފަށައިފިއެވެ. މި އައިސީޔޫ ހުޅުވައިދެއްވީ ރައީސް އޮފީހުގެ މިނިސްޓަރު ޢަލީ ޝިޔާމެވެ. އިއްޔެ ބޭއްވި މި ރަސްމިއްޔާތުގައި ހޮސްޕިޓަލްގެ އައިސީސީޔޫ ޕްރޮޓޮކޯލް ވެސް ވަނީ އިފްތިތާޙުކޮށްފައެވެ.
ކުރިން ހުރި ޖާގައިގެ ދަތިކަން ކުރިމަތިވެފައިވާ އައިސީޔޫގެ ބަދަލުގައި ފަހުން ހެދި އައިސީސީޔޫގެ ޚިދުމަތް ބަދަލުކުރީ، އެ ހޮސްޕިޓަލުގައި އަލަށް ތަރައްގީކުރި ތިން ފަންގިފިލާގެ ”ކާނި ވިންގް“ އިމާރާތުގެ އެންމެ މަތީ ބުރިއަށެވެ.
ކުޅުދުއްފުށީ ރީޖަނަލް ހޮސްޕިޓަލްގެ މީޑިއާ އޮފިޝަލް މުހައްމަދު މޫސާ މިއަދު ”ސަން“އަށް ވިދާޅުވީ މީގެ ކުރިން އެ ހޮސްޕިޓަލުގެ އައިސީސީޔޫގައި ހުރީ ހަތަރު އެނދާއި ތިން ވެންޓިލޭޓަރު ކަމަށެވެ. އަދި އޭރު ޖާގައިގެ ދަތިކަން ވެސް އޮތްކަމަށް ވިދާޅުވިއެވެ.
އަލަށް ތަރައްގީ ކުރެވުުނު އައިސީޔޫގައި ހަ އެނދު ހުންނައިރު ކޮންމެ އެނދެއް ކައިރީ ވެސް ވެންޓިލޭޓަރެއް ހުންނާނެއެވެ. މީގެ އިތުރުން ޑައިލިސިސްއަށް ހާއްސަކޮށްފައިވާ އެނދަކާއި އައިސޮލޭޝަން އެނދެއްވެސް ހިމެނެއެވެ.
މީގެ އިތުރުން، ބަލިމީހުންގެ އާއިލާތަކާ މައުލޫމާތު ހިއްސާކުރުމަށް ޒަމާނީ ބްރީފިން ރޫމެއް ވެސް މި އިމާރާތުގައި ވަނީ ހަމަޖައްސާފައެވެ.
އައިސީސީޔޫގެ ޚިދުމަތަށް ޚާއްސަ ޓީމެއް ވެސް އެ ހޮސްޕިޓަލުގައި ހަމަޖައްސާފައިވާއިރު ދާދި ފަހުން ވަނީ އާ އިމާރާތާއެކު 36 އެނދުގެ ޖާގަ ހޮސްޕިޓަލަށް އިތުރުކޮށްފައެވެ.
