ލ.މާވަށު ފަޅު ތެރޭގައި، މާވަށާއި ކައިރިން ރިސޯޓު ތަރައްގީ ކުރުމުގެ މަސައްކަތް ވަރަށް އަވަހަށް ފަށާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ހައްދުންމައްޗަށް ކުރައްވަމުން ގެންދަވާ ދަތުރުފުޅުގައި މިއަދު އެއަތޮޅު މާވަށު ރައްޔިތުންނާ ބައްދަލުކޮށް ދެއްކެވި ވާހަކަފުޅުގައެވެ. މީގެ އިތުރުން އެރަށުގައި މިހާރު ކުރިއަށްދާ ބިން ހިއްކުމުގެ މަޝްރޫއަށް އިޝާރާތްކޮށް އެ މަސައްކަތް ނިމޭއިރު ކުރިން ނިންމާފައިވާ ވަރަށް ވުރެ ދެގުނަ ބޮޑުކޮށް ހިއްކާދޭނެ ކަމަށްވެސް ވިދާޅުވިއެވެ.
ކުރީ ސަރުކާރުން ފަށާފައިވާ މާވަށު ބިން ބޮޑު ކުރުމުގެ ޕްރޮޖެކްޓުގެ ދަށުން ވަނީ 15 ހެކްޓަރުގެ ބައެއް ހިއްކުމަށް ނިންމާފައެވެ. ރައީސް ޑރ.މުއިއްޒު ވިދާޅުވީ މި ސަރުކާރުން އެ މަސައްކަތް ނިންމާއިރު 30 ހެކްޓަރު ގެ ބައެއް ރަަށަށް އިތުރުކޮށްދެއްވާނެ ކަމަށެވެ. އަދި މާވަށަށް ކުރިމަތިވާ އުދައެރުމުގެ މައްސަލައަށް ވެސް ހައްލެއް ލިބޭގޮތަށް އެ ސަރަޙައްދު ހިމާޔަތްކުރައްވާނެކަމުގައި އެމަނިކުފާނު ވިދާޅުވިއެވެ.
ކުރީ ސަރުކާރުން މުޅި ރާއްޖޭގައި ފަށާފައިވާ ޕްރޮޖެކްޓުތައް ހުއްޓިފައިވާތީ އެކަމާ ގުޅޭ ގޮތުން މިސަރުކާރަށް ފާޑުކިއުން އަމާޒުވަމުން ދާތީ، އެކަމާ ބެހޭގޮތުން ރައީސް ވިދާޅުވީ މި ސަރުކާރު އައިއިރު މުޅި ރާއްޖޭގައި ހުއްޓިފައިހުރި ބައެއް މަޝްރޫއުތައް އަލުން ފަށައިގެން މިހާރު ކުރިޔަށްދާ ކަމަށެވެ. އަދި 50 މިލިޔަނުން ފެށިގެން މަތީގެ ޚަރަދުތައް ހިނގާ ބޮޑެތި މަޝްރޫޢުތައްވެސް އެކި މަސްތަކަށް ބަހާލައިގެން ކުރިޔަށްގެންދާނެކަމަށާއި އެގޮތުން އެފަދަ ބައެއް މަޝްރޫޢުތައް ޖުލައި މަހާ ހިސާބުގައި ފެށޭނެކަމުގައި ރައީސް ވިދާޅުވިއެވެ.
ރައީސް ގެ ދަތުރުފުޅުގައި ރައްޔިތުންގެ މަޖުލީހަށް ކުރިމަތިލާފައިވާ ޕީއެންސީ ކެންޑިޑޭޓުންގެ ސިޔާސީ ބައެއް އިވެންޓުތަކުގައިވެސް ދަނީ ބައިވެރިވަމުންނެވެ. އިދިކޮޅު ފަރާތްތަކުން ދަނީ މިކަން ފާހަގަކޮށް ވަރަށް ބޮޑަށް ފާޑުކިޔަމުންނެވެ.
