ބެޓީ ކްރޮކާގެ ކޭކް މިކްސް ޕެކެޓުތައް ވިއްކުން ހުއްޓާލުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.
އެމްއެފްޑީއޭއިން މިއަދު ބުނީ ބެޓީ ކްރޮކާގެ ޕެކެޓުތަކުގައި އުކުނު ހުރިކަމަށް ބުނެ އާންމު ފަރާތަކުން ހުށަހެޅި ޝަކުވަާއަކާ ގުޅިގެން މާލޭގެ ބާޒާރުތަކުން އެ އުފެއްދުންތަކުގެ ސާމްޕަލްތައް ނަގައި ޓެސްޓް ކޮށްފައިވާ ކަަމަށެވެ.
މި ސާމްޕަލްތަކުގައި ގަނޑުލާފައި ހުރި ކަމަށާއި ބައެއް ސާމްޕަލްތައް އުކުނާއި ދިރޭ ސޫފިތަކުން ތަޣައްޔަރުވެފައިވާ ކަމަށް އެ އޮތޯރިޓީން ބުންޏެވެ. އެހެން ކަމުން މިއީ ކެއުމަށް ރައްކާތެރި ނޫން ތަކެތި ކަމަށް އެ އޮތޯރިޓީން ވަނީ ނިންމާފައެވެ.
މަނާކުރަން ނިންމީ 432 ގްރާމް, ބެޓީ ކްރޮކާ ސުޕަ މޮއިސްޓް ޗޮކްލެޓް ފަޖް (އެކްސްޕައިރީ ޑޭޓް 18 މާޗު 2024) އާއި 432 ގްރާމް, ބެޓީ ކްރޮކާ ސުޕަ މޮއިސްޓް މިލްކް ޗޮކްލެޓް (އެކްސްޕައިރީ ޑޭޓް 13 އޭޕްރީލް 2024) އެވެ.
ބެޓީ ކްރޮކާގެ ކޭކް މިކްސްއަކީ ރާއްޖޭގައި އާއްމުކޮށް ބޭނުންކުރާ ވަރަށް މަޝްހޫރު ބުރޭންޑެކެވެ. އާއްމު ހުރިހާ ފިހާރައެއްގައި މި ބުރޭންޑުގެ ކޭކް މިކްސް ލިބެން ހުރެއެވެ.
