ރިޔާސީ އިންތިހާބުގައި ފުރަތަމަ ބުރުން މޮޅުވާނެ ކަމަށް ހިސާބު ޖެއްސެވި އިރު ފާހަގަ ވެފައި ނެތް ބައެއް ގޯސްތައް ރަނގަޅުކޮށް ދެވަނަ ބުރުގައި އިތުރަށް މަސައްކަތް ކުރާނެ ކަމަށް ރައީސް އިބްރާހިމް މުހައްމަދު ސޯލިހި ވިދާޅުވެއްޖެއެވެ. ރާއްޖޭގެ ސިޔާސީ ތާރިހުގައި ބޭއްވި އެންމެ ވާދަވެރި އިންތިހާބުގައި ރައީސް އިބްރާހިމް މުހައްމަދު ސޯލިހުގެ މައްޗަށް ކުރި ހޯއްދެވީ މާލެ ސިޓީގެ މޭޔަރ ޑރ. މުހައްމަދު މުއިއްޒެވެ. އެމަނިކުފާނަށް ވޯޓުލީ މީހުންގެ 46% ލިބުނު އިރު ރައީސް ސޯލިހަށް ލިބިވަޑައިގަތީ %39 އެވެ. މި ދެ ކެންޑިޭޓުންނާ ގާތުންވެސް ވާދަނުކުރެވޭ ވަރަށް އަނެއް 6 ކެންޑީޑޭޓުންނަށް ލިބިފައިވަނީ މަދު ވޯޓު ތަކެކެވެ.
މި އިންތިހާބު އެއްބުރުން ކާމިޔާބު ކުރާނެ ކަމަށް ތަކުރާރު ދެ ޕާޓީންވެސް ބުނަމުން ދިޔައިރު ރައީސް ސޯލިހުވެސް ވަނީ އިންތިހާބު އެއްބުރުން ކާމިޔާބު ކުރާނެ ޕަސެންޓޭޖުވެސް ތަކުރާރުކޮށް ވިދާޅުވެފައެވެ. ނަމަވެސް މުޅި ރާއްޖެއިން ދެ ސަރަހައްދެއް ފިޔަވައި މެޖޯރިޓީ ހޯދާފައިވަނީ ޕީއެންސީގެ ކެންޑީޑޭޓު ޑރ. މުއިއްޒެވެ.
ރައީސް ސޯލިހު ވިދާޅުވީ ދެވަނަ ބުރަށް ތައްޔާރުވަމުންދާ ކަމަށާއި ބަޔަކާ ގުޅެން ޖެހ ކަމަށާއި، އެކަންކަން މިހާރުން ފެށީގެން ކުރަމުންދާ ކަމަށެވެ. އެމްޑީޕީގެ ޗެއަރޕަސަން ފައްޔާޒު އިސްމާއިލް ވިދާޅުވީ ނާކާމިޔާބުގައި ވަރަށް ގިނަ ސަބަބުތައް މެދުވެރިވީ ކަމަށާއި ހާއްސަކޮށް އެމްޑީޕީ އެތެރޭގެ މައްސަލަތަކުން ނަތީޖާއަށް އަސަރު ކުރިކަމަށެެވެ. ފައްޔާޒު އިސާރަތް ކުރެއްވީ އެމްޑީޕީން ވަކިވެގެން އުފެއްދި ޑިމޮކްރެޓްސް އާއި ނަޝީދުގެ ސަބަބުން އަދި އެބޭފުޅުން ތަކުރާރުކޮށް ސަރުކާރު ބަދުނާމު ކުރަން ދައްކަމުން ދިޔަ ވާހަކައަށެވެ.
އިންތިހާބުގެ ދެވަނަ ބުރެއް އޮންނާނީ މި މަހުގެ 30 ވަނަ ދުވަހުއެވެ.
