މެލޭޝިޔާ އެމްބަސީގެ އިސް މަގާމެއްގައި ހުރި މިނިސްޓަރ ޝަހީމުގެ ދަރިފުޅު އަބްދުﷲ މާހިލް ޝަހީމަށް މުސާރައާއި އިނާޔަތުގެ ގޮތުގައި 136000 ރުފިޔާ ދައުލަތުން ހަރަދު ކުރަމުންދާކަން ހާމަ ވެއްޖެއެވެ.
ސޯސަލް މީޑިއާގައި ދައުރުވަމުންދާ ޕޭ ސްލިޕުގައިވާ ގޮތުން މުސާރައިގެ ގޮތުގައި 105،000 ރުފިޔާ ލިބެއެވެ. މީގެ އިތުރުން ހުރުމާއި ދަރިންގެ އެލަވަންސާއި އެހެނިހެން އިނާޔަތުގެ ގޮތުގައި 31000 ރުފިޔާ ލިބެއެވެ.
އަބްދުﷲ މާހިލު ޝަހީމަކީ އިސްލާމިކް މިނިސްޓަރ ޑރ.ޝަހީމުގެ ދޮށީ ދަރިފުޅެވެ. މާހިލު ދިރިއުޅެނީވެސް މެލޭޝިޔާގައެވެ. މާހިލް ޝަހީމަށް ވަޒީފާ ދީފައިވަނީ މިދިޔަ ޖޫން މަހުގައެވެ.
ދައުލަތުގެ ހަރަދުތައް ބޮޑުވެ، ހަރަދު ކުޑަ ކުރުމަށް ރައީސް ޑރ.މުހައްމަދު މުއިއްޒު އިލްތިމާސް ކުރައްވާފައިވާ ދަނޑިވަޅެއްގައި ސަރުކާރުގެ ސިޔާސީ މަގާމުތައް އިތުރުވެ، ބޮޑެތި މުސާރަތައް ހަމަޖައްސަމުންދާތީވެ، އާއްމުން އަންނަނީ ސަރުކާރަށް ފާޑުކިޔަމުންނެވެ.
މިނިސްޓަރ ޝަހީމުގެ އިތުރުން އެމަނިކުފާނުގެ ކޮއްކަ އަހުމަދު ޝިފާޒު އަލީ ސައީދުވަނީ ޓުއަރިޒަމް މިނިސްޓްރީގެ ނައިބުގެ މަގާމަށް އައްޔަން ކޮށްފައެވެ. ޝަހީމުގެ އަނބިކަނބަލުން ފާތުމަތު އާފިޔާ އަކީ ސަރުކާރު ހޮސްޕިޓަލްތައް ހިންގާ ކުންފުނީގެ ބޯޑު މެމްބަރެކެވެ.
