މި އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖުލީހުގެ އިންތިހާބު މާރޗު 17 ވާ އާދިއްތަ ދުވަހު ބޭއްވުމަށް އިލެކްޝަން ކޮމިޝަނުން ނިންމައިފިއެވެ. އެ ކޮމިޝަނުން މިއަދު ނެރުނު ބަޔާނެއްގައި ބުނެފައިވަނީ މަޖުލީހުގެ އިންތިހާބު ލަސް ކޮށްފި ނަމަ ތަފާތު ގޮންޖެހުންތައް ހުރުމުން އެ ތާރީހުގައި ނޫން ގޮތަކަށް އިންތިހާބު ބޭއްވޭކަށް ނެތެވެ. މާރޗު 17 ދިމާވަނީ ރަމަޟާން މަހުގެ 7 ނުވަތަ 6 ވަނަ ދުވަހާއެވެ.
އިންތިހާބު މި ތާރީހުގައި ބޭއްވުމަށް އިލެކްޝަން ކޮމިޝަނުން ނިންމުމުގައި ބަލާފައިވާ ކަންކަމަކީ:
-ރޯދަމަހުގެ ފަހުން އިންތިހާބު ބާއްވާ ނަމަ އިދާރީ ގޮތުން ބޮޑެތި ދަތިތަކެއް ހުރުން
-އެޑިޔުކޭޝަން މިނިސްޓްރީން ތައުލީމީ ކަލަންޑަރަށް ގެނެސްފައިވާ ބަދަލުގެ ސަބަބުން ކުޑައީދު ބަންދަށްފަހު ސްކޫލުތަކުގެ އިމްތިހާނު ފެށުމަށް ހަމަޖައްސާފައިވާތީވެ، ވޯޓު ފޮށިތައް ބެހެއްޓުމަށް ސްކޫލުތަކުގެ ހޯލު ލިބުމުގައި ހުރި މައްސަލަތައް
-ރޯދަމަހުގެ ފަހު ދިހައެއް ސަރުކާރު ބަންދު ދުވަސްތަކެއްގެ ގޮތުގައި ހަމަޖައްސާފައިވާތީވެ، ސަރުކާރު މުއައްޒަފުންނާއި ދައުލަތުގެ މުއައްސަސާތަކާއި އެކު ކުރަން ޖެހޭ މަސައްކަތްތައް ކުރުމުގައި ދަތކަމެއް ދިމާވެދާނެތީ
މީގެ ކުރިން ރައްޔިތުންގެ މަޖުލީހާއި އިލެކްޝަން ކޮމިޝަނުން މަޝްވަރާ ކުރުމުން ، މަޖުލީހުގެ ވިސްނުން ހުރީ ރޯދައިގެ ފަހުން މަޖުލީހުގެ އިންތިހާބު ބޭއްވުމަށެވެ.
