'ކުރުސީ' އަކީ މީރާއެއް ނޫން - ނަޝީދު

ސޯސަލް މީޑިއާ އެކްސްގައި ؛ހަސަން ކުރުސީ‘ ގެ ނަމުގައި ބޭނުންކުރަމުންދާ އެކައުންޓަކީ މީރާއެއް ނޫން ކަމަށް ރައީސް ނަޝީދު ވިދާޅުވެއްޖެއެވެ.

ރައީސް ނަޝީދުގެ ދަރިކަނބަލުން މީރާކަމަށް ބުނެ ގިނަ ބަޔަކު ވާހަކަ ދައްކަމުންދަނީ މި ދުވަސްކޮޅު އިންޑިއާއާއި ދެކޮޅު ކެމްޕޭނެއް ކުރުސީގެ ހިންގަމުންދާތީ، އިންޑިއާ މީހުންނާއި ބައެއް ދިވެހިން ތުހުމަތު ކުރަނީ ކުރުސީއަކީ އިނގިރޭސިވިލާތުގައި ހުންނަ މީހަކު ކުރަމުންދާ ކަމެއް ކަމަށާއި އެއީ ނަޝީދުގެ ދަރިކަނބަލުން މީރާ ކަމަށެވެ. މި ވާހަކަތައް ދޮގު ކުރަމުން ރެއިން ފެށިގެން މީރާ ވެސް ބުނަމުން އަންނަނީ ކުރުސީ އާއި މީރާއާއި އެއްވެސް ގުޅުމެއް ނެތް ކަމަށެވެ. ނަޝީދު ވިދާޅުވީ ކުރުސީގެ ނަމުގައި ސޯސަލް މީޑިއާ އެކްސްގައި ބޭނުން ކުރަމުންދާ އެކައުންޓުގައި ލިޔަމުންދާ ލިޔުންތަކާއި އަދި އެ އެކައުންޓު އޮޕަރޭޓު ކުރުމާއި، އެނޫންވެސް އެއްވެސް ދައުރެއް އެމަނިކުފާނުގެ ދަރިކަނބަލުން މީރާގެ ނެތް ކަމަށެވެ. މީގެ އިތުރުން އިންޑިއާއަށް ކުރަމުންދާ ފުރައްސާރަ ބަލައި ނުގަންނަ ކަމަށާއި އެކަން ކުށްވެރިކުރާ ކަމަށެވެ.

އިނގިރޭސި ވިލާތުގައި ދިިރިއުޅެމުންދާ މީރާ ވެސް ބުނެފައިވަނީ ހަސަން ކުރުސީއާއި މީރާ އެއްވެސް ގުޅުމެއް ނެތް ކަމަށެވެ. ހަސަން ކުރުސީގެ ވާހަކަތަކާއި މީރާއާއި ގުޅުވައި ބައެއް ދިވެހިންނާއި އިންޑިއާ މީހުންގެ ފާޑުކިއުންތައް ބޮޑުވެ، މީރާގެ އެކްސް އެކައުންޓުވެސް ވަނީ މިއަދު ޑިއެކްޓިވޭޓު ކޮށްލާފާއެވެ.

ކާކުކަން ނޭންގޭ ގޮތަށް ހަސަން ކުރުސީގެ ނަމުގައި އެކްސްގައި ބޭނުން ކުރަމުންދާ އެކައުންޓަކީ ކުރީގެ ރައީސް ނަޝީދު އަދި އެމަނިކުފާނުގެ ސިޔާސީ ފިކުރަށް ތާއިދުކޮށް، އެމްޑީޕީއާއި ރައީސް ސޯލިހަށް ވަރަށް ބޮޑަށް ފާޑުކިޔައިމުން އައި އެކައުންޓެކެވެ. އޭގެ ފަހުން ރިޔާސީ އިންތިހާބުގައި ރައީސް މުއިއްޒަށް ތާއިދުކޮށް ރައީސް ސޯލިހުގެ ސަރުކާރަށް އެކި ތުހުމަތުތައް ވަނީ ކޮށްފައެވެ. މިހާރުގެ ރައީސް ޑރ.މުއިއްަޒު އިންތިހާބުވެ، ރައީސް ޔާމީނާއި މައްސަލަ ޖެހުމުން ކުރުސީގެ ޓުވީޓުތައް ކުރަމުން ދިޔައީ ރައީސް މުއިއްޒާ ސަރުކާރާއި ދެކޮޅަށެވެ. މި ފަހުން އުފެދުނު އިންޑިއާއި ރާއްޖެ މައްސަލަގަނޑުގައި ކުރުސީގެ އެކައުންޓުން ނަސްލީގޮތުން އިންޑިއާ ރައްޔިތުންނާ ދިމާކޮށް، އިންޑިއާގެ ކަންކަމަށް އަންނަނީ ވަރަށް ހުތުރުކޮށް ފާޑުކިޔަމުންނެވެ.

Don't try to be over-smart @HKurusee
You tweeted the same Pro India tweets from this account also.

But in last few days you have chosen to attack India and Hindus.

Whatever your motive might be, but you can't shield it just because your father is pro-India.

It doesn't give… https://t.co/Z87WHmPk60 pic.twitter.com/kGcBOIJrF2
— Vijay Patel🇮🇳 (@vijaygajera) January 9, 2024

އިންޑިއާ ގުޅުވައި ކުރުސީ ދައްކަމުން އަންނަ ވާހަކަތާކާ ދޭތެރޭ އިންޑިއާ މީހުންގެ އިތުރުން ބައެއް ދިވެހިންވެސް ހިތްހަމަ ނުޖެހުން އަންނަނީ ފާޅުކުރަމުންނެވެ. ދިވެހިންގެ ނަމުގައި ކުރުސީ ދައްކަމުން އަންނަ ވާހަކަތަކުން ރާއްޖޭގެ ޓުއަރިޒަމާއި އިންޑިއާ ރާއްޖެ ގުޅުމަށްވެސް ބުރޫއަރާ، މިހާރު ޖެހިފައިވާ މައްސަލަ އިތުރަށް ގޯސްވަމުން އަންނަ ކަމަށް ބައެއް ފަރާތްތަކުން އަންނަނީ ބުނަމުންނެވެ.