ގަލޮޅު ކަންމަތީގައި އޮތް ވޭނެއްގެ ތެރެއިން ބާރުގަދަ އަޑުފައްގަނޑެއް އިވުނީ އެއްޗެއް ގޮވައިގެން ނޫން ކަމަށް އެމްއެންޑީއެފުން ބުނެފިއެވެ.
މީޑިއާއަށް މައުލޫމާތު ދެމުން އެމްއެންޑީއެފުން ބުނީ ގަލޮޅު ކަންމަތީގައި އޮތް ވޭނެއްގެ ތެރެއިން އެއްޗެއް ގޮވި ކަމުގެ ރިޕޯޓު ލިބުމުން މިހާތަނަށް ބެލި ބެލުމުން އެއީ އެއްޗެއް ގޮވައިގެން ހިނގި ހާދިސާއެއް ކަމަށް ނުބެލެވޭ ކަމަށެވެ. މި ގޮތުން ގޮވި އެއްޗެއްގެ ނިޝާނެއްވެސް ފެނިވައިނުވާ ކަމަށް އެމްއެންޑީއެފުން މައުލޫމާތު ދެއެވެ. މި ހާދިސާގައި ވޭނަށްވެސް އަދި އެއްވެސް މީހަކަށް ގެއްލުމެއް ވެފައި ނުވެއެވެ.
އެމްއެންޑީއެފުން ބުނީ އަޑުފައްގަނޑު އިވުނީ އުޅަނދަށް ދިމާވި ޓެކްނިކަލް މައްސަލައަކުން ކަމަށް ބެލެވޭ ކަމަށެވެ. އަދި އިތުރު ނުރައްކަލެއް ނެތްކަން ވެސް ކަށަވަރު ވާތީ އެ ސަރަހައްދު ފުލުހުންނާ ހަވާލުކޮށްފައިވާ ކަމަށާއި އެ ޚިދުމަތުން މައްސަލަ ބަލަމުން އަންނަ ކަމަށް އެމްއެންޑީއެފުން ބުންޏެވެ.
