ހޯރަފުށި ކައުންސިލުގައި ތިބީ ވަގުން ކަމަށް ބުނެ ކުރިން އެ ދާއިރާގެ މެމްބަރު މުހައްމަދު އިސްމާއިލް ކައުންސިލަށް ވަރަށް ބޮޑަށް ފާޑުކިޔައިފިއެވެ.
ހޯރަފުށި ކައުންސިލުން އެކްސް ގައި ކުރި މެސެޖަކަށް ޖަވާބު ދެމުން މުހައްމަދު އިސްމާއިލް ބުނެފައިވަނީ އެކައުންސިލުގައި ތިބީ ވަގުން ކަމަށާއި، އެ ވަގުންގެ ތަރުތީބު ލިސްޓެއްވެސް އޭނާ ވަނީ ސޯޝަލް މީޑިއާގައި ޝާއިއުކޮށްފައެވެ.
ހޯރަފުށްޓަށް އުފަން މުހައްމަދު އިސްމާއިލަކީ ވިލިމާލެ ދާއިރާގެ މަޖުލިސް މެމްބަރެވެ. މީގެ ކުރިން ހޯރަފުށި ދާއިރާގެ ރައްޔިތުން މަޖުލީހުގެ އެއް ދައުރު ފުރިހަމަ ކުރުމަށް ފަހު ޖެހިގެން އައި ދައުރު ބޮޑު ތަފާތަކުން ބަލީވީ އަހުމަދު ސަލީމް (ސައްލެ) އާއި ވާދަކޮށްގެންނެވެ. ހޯރަފުށިން ވާހަކަ ދެއްކި މީހަކު ބުނީ އޭގެ ފަހުން (އިންތިހާބުގައި ބަލިވި ފަހުން) މުހައްމަދު އިސްމާއިލާއި ކައުންސިލާ ދެމެދު އަބަދުވެސް ބަހުގެ ހަމަލާ ބަދަލުކުރާ ކަމަށާއި މި ސަރުކާރު ފެށުނު ފަހުން މުހައްމަދު އިސްމާއިލު ކައުންސިލަށް ވަރަށް ބޮޑަށް ދަތިކުރަން މަސައްކަތްކުރާ ކަމަށެވެ.
މުހައްމަދު އިސްމާއިލަކީ ވެރިކަންކުރާ ޕީއެންސީގެ މެމްބަރެކެވެ. ހޯރަފުށި ކައުންސިލުގައި ހިމެނެނީ މުޅިންވެސް އެމްޑީޕީގެ މެމްބަރުންނެވެ. 19 ވަނަ ރައްޔިތުންގެ މަޖުލީހަށް ހޯރަފުށި ދާއިރާގެ ގޮނޑި ކާމިޔާބުކޮށްފައިވަނީ މުހައްމަދު އިސްމާއިލާއި ގާތް ގުޅުމެއް އޮންނަ އަލީ މޫސާއެވެ.
މުހައްމަދު އިސްމާއިލުގެ ވާހަކައަށް ރައްދު ދެމުން ކުރން ޕީޕީއެމްގައި މަސައްކަތް ކުރި ހޯރަފުށި މީހަކު ބުނީ ހިޔާނާތާއި ވައްކަމުގެ ވާހަކަ ދައްކަން މުހައްމަދު އިސްމާއިލު އެކަށީގެން ނުވާ ކަމަށެވެ. މި ގޮތުން އެމްއެމްޕީއާރުސީން ފައިސާ ލިބުނު މީހުންގެ ތެރޭގައި މުހައްމަދު އިސްމާއިލު ހިމެނޭއިރު، އަމިއްލަ އިއުތިރާފުންވެސް ’ފައިސާ ގޯނި‘ ހިފައިގެން މެމްބަރުންނާއި ސިޔާސީ ވެރިންގެ އަރިހަށް ދިޔަ ކަމަށް އެއްބަސްވެފައިވާ ކަމަށެވެ. މީގެ އިތުރުން މިހާރު ގެ މެމްބަރު އަލީ މުސާ ވެސް ވައްކަމުގެ ބޮޑު މައްސަލައެއް އޭސީސީން ތަހުގީގުކޮށްފައިވާ ކަމަށާއި، ވެމްކޯގެ ބޮޑު ހިޔާނާތެއްގައިވެސް އަލީ މޫސާ ބައިވެރިވެފައިވާ ކަމަށް ސާބިތުވެފައިވާ ކަމަށެވެ.
ހޯރަފުށި ކައުންސިލުގެ އޮޑިޓު ރިޕޯޓާއި ބެހޭ ގޮތުން އެ ކައުންސިލުން ވަނީ ބަޔާނެއްް ނެރެފައެވެ. އެ ބަޔާނުގައި ބުނެފައިވަނީ ކައުންސިލު މުއައްޒަފުންނާއި އަދި ކައުންސިލަރުން އަގު ވެއްޓޭ ގޮތަށް އަދި ހިޔާނާތާއި ވައްކަމުގެ ތުހުމަތު އެޅުވޭ ގޮތަށް އެ ކައުންސިލާ މެދު ވާހަކަ ދެކެވެމުންދަނީ ރަނގަޅު މައުލޫމާތު ލިބިފައިނުވާ މީހުންނެވެ. އެހެންކަމުން ރަނގަޅު މައުލޫމާތު ހާމަކުރުމަށް އެކައުންސިލުން އެދެއެވެ.
