ޕީޕަލްސް ނެސެނަލް ފްރޮންޓު (ޕީއެންއެފް) އުފެއްދުމަށް ބާއްވަން ހަމަޖެހިފައިވާ ޖަލްސާ ފުލުން ހުއްޓުވައިފިއެވެ. ފުލުހުން މައުލޫމާތުދޭ ގޮތުގައި ގިޔާސުއްދީން ސްކޫލަށް ފުލުހުން ދިޔައީ އެޑިއުކޭޝަނުގެ އެދުމުގެ މަތިން އެ ’ސްކޫލު ހިމާޔަތް ކުރުމަށެވެ‘. ފުލުހުން ބުނެފައިވަނީ ޕީއެންއެފްއިން ޖަލްސާ ބޭއްވުމަށް އެ ސްކޫލުން ދީފައިވާ ހުއްދަ ފަހުން ބާތިލުކޮށްފައިވާ ކަމަށެވެ.
ފުލުހުން ވަނީ ގިޔާސުއްދިން ސްކޫލު ގޭޓު އާއްމުން ނުވަދެވޭ ގޮތަށް ބަންދުކޮށްފައެވެ. އަދި އެ ވަގުރު ހޯލުގައި ތިބި ޕީއެންއެފްގެ މެމްބަރުންވަނީ ހޯލުން ނެރެ އެއްވެސް މީހަކަށް ނުވަދެބޭ ގޮތަށް ގިޔާސުއްދީން ސްކޫލު ސަރަހައްދުވެސް ބަންދުކޮށްފައެވެ. ކަރުނަގޭސް ޖަހައިގެން ޕީއެންއެފް މެމްބަރުން އެ ސަރަހައްދުން ފޮނުވާލަން އުޅުމުގެ ތެރޭގައި ބައެއް މީހުންނަށް އަނިޔާވި މަންޒަރުވެސް ވަނީ ފެނިފައެވެ.
ރައީސް ޔާމީނު އިސްވެ ހުންނަވައި އުފައްދަން މަސައްކަތް ކުރަމުންދާ ސިޔާސީ ޕާޓީގެ އިސް އޮފިޝަލަކު ވިދާޅުވީ ސަރުކާރުން އިންޒާރުދީ ބިރު ދެއްކުމުން ފަހު ވަގުތު ގިޔާސުއްދިން ސްކޫލުންވަނީ އެ ޕާޓީން ޖަލްސާ ބާއްވަން ދިން ހުއްދަ ބާތިލުކޮށްފައެވެ. މީގެ އިތުރުން ކަރަންޓު ދިނުމަށް ސްޓެލްކޯއިން ދެކޮޅު ހެދުމުން އަމިއްލަ ޖެނެރޭޓަރެއްވެސް ވަނީ ގިޔާސުއްދީން ސްކޫލަށް ގެންގޮސް ހޯލަށް ކަރަންޓުދީފައެވެ. މި ވަރަށް ތައްޔާރުވެފައި ވަނިކޮށް ފަހު ވަގުތު ޕާޓީގެ ޖަލްސާއަށް ހުރަސްއެޅީ ރައީސް ޑރ.މުއިއްޒުގެ އެންގެވުމަށް ކަމަށްވެސް ޕީއެންއެފްއިން ތުހުމަތު ކުރެއެވެ.
