ކޮވިޑް ވެކްސިންގެ ފުރަތަމަ ޑޯޒް ޖަހާފައިވާ މަސްވެރިއެއްގެ ކުއްލި މަރެއް، ހެލްތު ޕްރޮޓެކްޝަން އޮތޯރިޓީން ތަހުގީގު ކުރަން ފަށައިފިއެވެ.
އެޗްޕީއޭއިން މިއަދު މީޑިއާތަކަށް ފޮނުވާފައިވާ މެސެޖެއްގައި ބުނެފައިވަނީ މަރުވި މީހާއަކީ އުމުރުން 45 އަހަރުގެ އއ. މާޅޮސް މީހެއް ކަމަށެވެ.
އެ އިދާރާ އިން ބުނީ އއ. މާޅޮސް، 45 އަހަރުގެ އެ ފިރިހެން މީހާއަށް އެ ރަށުގައި އިއްޔެ ވެކްސިން ދީފައިވާ ކަމަށެވެ. އަދި އޭނާ ދޯންޏެއްގައި ދަތުރުކުރަނިކޮށް ހާލު ދެރަވުމުން އިތުރުފަރުވާ އަށް ގެންދިޔައީ ކ. ހިންމަފުއްޓަށް ކަމަށް ވެސް އެޗްޕީއޭ އިން ބުންޏެވެ. އޭނާ މަރުވީ މިއަދު ހެނދުނު 9:13 ގަ އެވެ. އޮންނަ އުސޫލުގެ ތެރެއިން އޭނާގެ މަރު ތަހުގީގު ކުރަމުން އަންނަ ކަމަށް އެޗްޕީއޭއިން ބުންޏެވެ. އެޗްޕީއޭއިން ވަނީ ވެކްސިންއާ ގުޅުމެއް ނެތް ނަމަވެސް ސީރިއަސް ސިއްޚީ ކަންތައްތަކެއް ދިމާވުމަކީ އެކަށީގެންވާ ކަމެއް ކަމަށް ބުނެފައެވެ.
