މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ކޮމިޝަނަރ ޖެނެރަލް އޮފް ޓެކްސޭޝަން އިސްތިއުފާ ހުށަހަޅުއްވާފައި ވާތީ، ހުސްވެފައިވާ މަގާމަށް ބޭފުޅަކު ޢައްޔަން ކުރެއްވުމަށް ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ކުރިމަތިލުމުގެ ފުރުޞަތު ސަރުކާރުން ހުޅުވާލައްވައިފިއެވެ.
މީރާގެ އެންމެ އިސްވެރިޔާ އައްޔަން ކުރުމަށް ރައީސް އޮފީހުން ކޮށްފައިވާ އިއުލާނުގައިވާ ގޮތުން މި މަޤާމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައި ވަނީ، 2024 ފެބުރުވަރީ 20 އަދި 21 ވަނަ ދުވަހު ހެނދުނު 08:00 އިން މެންދުރު 12:00 އަށް ރައީސުލްޖުމްހޫރިއްޔާގެ އޮފީހުންނެވެ.
މި މަގާމަށް ކުރިމަތިލާ ފަރާތްތަކުގެ ޝަރުތުތަކުގެ ތެރޭގައި އިގްތިސާދީ ނުވަތަ ޓެކްސްއާއި ގުޅުން ހުރި ދާއިރާ އަކުން މާސްޓަރސް ޑިގުރީ ހާސިލުކޮށްފައިވާ ފަރާތަކަށް ވާން ޖެހޭނެއެވެ. މީގެ އިތުރުން ސަރުކާރުގެ މާލިއްޔަތާއި ބެހޭ ދާއިރާއެއްގައި މަދުވެގެން 10 އަހަރު މަސައްކަތްކޮށް ތަޖުރިބާ ލިބިފައިވާ ފަރާތަކަށްވެސް ވާން ޖެހެއެވެ. މީރާގެ ކޮމިޝަނަރ ޖެނެރަލް ގެ ޝަރުތުތަކުގެ ތެރޭގައި ސަރުކާރުގެ ނުވަތަ އަމިއްލަ ކުންފުންޏެއްގެ ހިންގުމުގައި އިސްކޮށް ހަރަކާތްތެރިވާ ނުވަަތަ ޑިރެކްޓަރުންގެ ބޯޑުގައި ހިމެނިފައިނުވާ ފަރާތަކަށް ވާން ޖެހެއެވެ.
މީރާގެ ކޮމިޝަނަރ ޖެނެރަލް އޮފް ޓެކްޝޭޝަނުގެ މަގާމުގައި އެންމެ ފަހުން ހުންނެވީ ފަތުހުﷲ ޖަމީލެވެ. މީރާ އުފެއްދުނީއްސުރެ އެންމެ އިސް މަގާމުތަކުގައި ހަރަކާތްތެރިވި ފަތުހުﷲ އިސްތިއުފާދެއްވާފައިވަނީ ކުރިއަށް އޮތް ރައްޔިތުންގެ މަޖުލީހުގެ އިންތިހާބުގައި ވާދަކުރެއްވުމަށެވެ.
މި މަޤާމަށް ކުރިމަތިލެއްވުމަށް އެދޭ ފޯމު ރައީސް އޮފީހުގެ ރިސެޕްޝަނުން ލިބިވަޑައިގަންނަވާނެއެވެ. މީގެ އިތުރުން މި މަޤާމަށް އެދި ހުށަހަޅާފޯމު ރައީސް އޮފީހުގެ ވެބްސައިޓުން ޑައުންލޯޑު ކުރެވޭނެއެވެ.
