މިދިޔަ ހުކުރު ދުވަހުގެ ރޭ މާލޭގައި ހިނގި އެކްސިޑެންޓުގައި ސީރިޔަސް އަނިޔާވިތަކެއް ލިބުނު ކުރީގެ ހެލްތު މިނިސްޓަރު އަބްދުﷲ އަމީންގެ ބައްޕަ އަހުމަދު މަނިކު ރޭ ދަންވަރު ނިޔާވެއްޖެއެވެ.
އެކްސިޑެންޓަށް ފަހު އައިޖީއެމްއެޗްގެ އައިސީޔޫގައި ފަރުވާ ދެމުން ދަނިކޮށް އުމުރުން 74 އަހަރުގެ އަހުމަދު މަނިކު ނިޔާވީ ރޭ ދަންވަރުއެވެ.
އެކްސިޑެންޓުގައި އޭނާގެ ބޮލަށް ލިބުނު އަނިޔާތަކާ ގުޅިގެން ހާލު ސީރިއަސްވުމުގެ ސަބަބުން ޑޮކްޓަރުން އޮތީ އުންމީދު ވެސް ކަނޑާލައިފައެވެ.
ގދ. ގައްދުއަށް އުފަން އަހުމަދު މަނިކު އެކްސިޑެންޓުވީ ސައިކަލްގައި ދަނިކޮށް، ބޮޑުތަކުރުފާނު މަގުގައި ހުންނަ އޮކްސިޖެން ކެފޭ ކައިރިން ކާރެއްގައި ޖެހިގެންނެވެ.
އޭނާއަކީ ރާއްޖެއިން ޖަޕާނަށް ކަނޑައަޅާފައި ހުންނަވާ ޑެޕިއުޓީ އެމްބެސެޑަރު އަދި ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު އަމީތުގެ ވެސް ބައްޕައެވެ. އަހުމަދު މަނިކު ނިޔާވުމުން ގިނަ ބަޔަކު ދަނީ އެ އާއިލާއަށް ތައުޒިޔާ ކިޔަމުންނެވެ. އަހުމަދު މަނިކުގެ ދަރިކަލުން އަމިތު ކުރެއްވި އެކްސް މެސެޖެއްގައި ވިދާޅުވީ ބައްޕައަށް އިހުލާސްތެރިކަމާ އެކު ހެޔޮ ދުއާ ކޮށްދެއްވި ހުރިހާ ފަރާތްތަކަށް ޝުކުރު އަދާކުރާ ކަމަށެވެ.
އަހުމަދު މަނިކުގެ ޖަނާޒާ އޮންނާނީ މިއަދުގެ އަސްރު ނަމާދަށް ފަހު ހުޅުމާލޭގެ ސަހަރާ މިސްކިތުގައެވެ.
