މިދިޔަ ހަފްތާ ބަންދުގައި ’ހަރުގެ ޖަލްސާ‘ ގެ ނަމުގައި އެމްޑީޕީން ބޭއްވި ޖަލްސާގައި ގުރުއާން ކިޔެވި އެޗްޑީސީގެ މުއައްޒަފު ކުއްލިއަކަށް ވަޒީފާއިން ވަކިކޮށްފިއެވެ.
މި ދިޔަ ބުރާސްފަތި ދުވަހުގެ ރޭ އެމްޑީޕީން ބޭއްވި ޖަލްސާ ފެށުމުގެ ގޮތުން ގުރުއާން ކިޔެވީ އަހުމަދު ޝާއިންއެވެ. އޭނާ އެރޭ ގުރުއާން ކިޔެވީ ކުރިއަލާ ރާވައިގެން ނޫން ކަމަށާއި އެއީ އެކަމުގައި އުޅުނު މީހަކަށް ނާދެވުމުން ޝާއިންއަށް ދިން ދައުވަތެއްކަމަށް އެމްޑީޕީން ބުނެއެވެ. އެ ޕާޓީންވަނީ އެޗްޑީސީގެ މި އަމަލު ވަރަށް ބޮޑަށް ކުށްވެރިކޮށްފައެވެ.
މި ދިޔަ ޖޫން މަހުގެ ތެރޭގައިވެސް ގިނަ އަދަދެއްގެ މުއައްޒަފުންވަނީ ސަރުކާރު ގެ ކުންފުނިތަކުން ވަކިކޮށްފައެވެ.. ހަރަދު ކުޑަ ކުރުމުގެ ފިޔަވަޅެއްގެ ގޮތުން ކަމަށް ބުނެ ވަޒީފާއިން ވަކިކުރާ މުއައްޒަފުން ބުނަނީ އެމީހުން ވަކިކުރަނީ ހަރަދު ކުޑަކުރުމުގެ ގޮތުން ނޫން ކަމަށާއި ސިޔާސީ ފިކުރަށް ބަލައިގެން ވަކިކުރަނީ ކަމަށެވެ. އެމީހުން ވަޒީފާއި ވަކިކުރުމަށް ފަހު އެ ޖޮބު ތަކަށް އެހެން މީހުން އައްޔަން ކުރާ ކަމަށްވެސް ތުހުމަތު ކުރެއެވެ.
