އިންޑިއާގެ ބޮޑުވަޒީރު ނަރެންދުރަ މޯދީއަށް ފުރައްސާރަކޮށް، ނަސްލީ ގޮތުން ދިމާކުރި ނައިބު ވަޒީރުންގެ އަމަލުތައް ކުށްވެރިކޮށް މަޓީން ބަޔާނެއް ނެރެފިއެވެ.
ރާއްޖޭގެ ޓުއަރިޒަމް އުފެއްދި ބޭފުޅުންނާއި ރިސޯޓުތަކުގެ އެންމެ އިސްވެރިން ހިމެނިވަޑައިގަންނަވާ މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (މަޓީން) ބުނެފައިވަނީ ދިވެހި ސަރުކާރުގެ ބައެއް މިނިސްޓްރީތަކުގެ ނައިބު ވަޒީރުން ގެ އަމަލު ކުއްވެރިކުރާ ކަމަށާއި، އިންޑިއާގެ ބޮޑު ވަޒީރު މޯދީއަށް ބޭއިހުތިރާމު ރައްދުވާ ގޮތަށް، އަދި އިންޑިއާއާއި ރާއްޖޭގެ ޒަމާންވީ ގުޅުމަށް ބުރޫއަރާ ގޮތަށް ވާހަކަދެއްކި ސަރުކާރުގެ ވެރިންގެ ބަސްމަގާއި ދޭތެރޭ ހިތާމަކުރާ ކަމަށެވެ.
މީގެ އިތުރުން މަޓީގެ ބަޔާނުގައި ބުނެފައިވަނީ އިންޑިއާއަކީ ރާއްޖޭގެ އަވައްޓެރިގައުމެއްގެ އިތުރުން ބޮޑެތި ކާރިސާތަކުގައި އެންމެ އަވަހަށް އިޖާބަދީ، ރާއްޖޭއަށް ވަރަށް ބޮޑަށް އެހީތެރިކަމެއްދޭ ގައުމެއް ކަމަށާއި އެކަން ކަމަށް އަބަދުވެސް ޝުކުރުއަދާކުރާ ކަމަށެވެ. އިންޑިއާއަކީ ރާއްޖޭގެ ޓުއަރިޒަމް އިންޑަސްޓްރީގެ މުހިއްމު ބައިވެރިއެކެވެ. ހާއްސަކޮށް ކޮވިޑް19 ގެ ބަލިމަޑުކަމުގައި މުޅި އިގްތިސާދު ހާއްސަކޮށް ޓުއަރިޒަމް އިންޑަސްޓްރީ ބަންދުކޮށްލައިގެން އޮތްއޮތުން ނިމުމަކަށް ގެނެސް އަލުން ކޮޅަށް ޖެހުމަށް ކުރި މަސައްކަތުގައި ވަރަށް ބޮޑު އެހިތެރިކަމެއް ލިބުނު ކަމަށްވެސް މަޓީގެ ބަޔާނުގައި ބުނެފައިވެއެވެ.
މަޓީގެ ބަޔާނުގައި އިތުރަށް ބުނެފައިވަނީ އިންޑިއާގެ ޓުއަރިސްޓުންގެ ފަރާތުން ރާއްޖޭގެ ޓުއަރިޒަމަށް ފައިދާތަކެއް ކުރާ ކަމަށާއި ރާއްޖެ އަންނަ ފަތުރުވެރިންގެ ތެރެއިން އިންޑިއާ ހިމެނެނީ އެންމެ ގިނައިން ފަތުރުވެރިން އަންނަ އެއް ގައުމެވެ. އެހެންކަމުން ދެ ގައުމުގެ ޒަމާންވީ ގުޅުމާއި ޓުއަރިޒަމަށް ލިބެމުންދާ އެހީތެރިކަމަށް ބުރޫއަރާނެ ކަންކަން ނުކުރުމަށް މަޓީން އިލްތިމާސް ކުރެއެވެ.
