ކުރީގެ ރައީސް އަދި ޕީޕއެމް ޕީއެންސީ ކޯލިޝަންގެ ލީޑަރ ޔާމީން އަބްދުލްގައްޔޫމުގެ ބިޔަ ކެމްޕޭނު ބޯޑު ބިމާ ހަމަކޮށްލި ގޮތުން ގިނަބަޔަކު ފާޑުކިޔުން، ޕީއެންސީއާއި ސިޓީކައުންސިލަށް އަމާޒުވެއްޖެއެވެ. ރިޔާސީ އިންތިހާބު ކާމިޔާބު ކުރެއްވި ޑރ. މުއިއްޒުގެ ކޮންޓްރޯލް އޮންނަ ސިޓީ ކައުންސިލުގެ މުއައްޒަފުން ޔާމީންގެ ފޮޓޯ ޖެހި ރިޔާސީ ކެމްޕޭނުގެ ބިޔަ ބިލްބޯޑު ބިމާ ހަމަކޮށްލީ އޭގައިވާ ރައީސް ޔާމީންގެ ތަސްވިރާއި އެކީ އެއްވެ ތިބި ގިނަ ބައެއްގެ ހާޒިރުގައެވެ.
އެކަމުގެ ކަންބޮޑުވުން ފާޅުކުރަމުން ޕީޕީއެމްގެ ސަޕޯޓަރެއް އެކްސް ގައި ހިއްސާކޮށްފައިވާ މެސެޖެއްގައި ބުނެފައިވަނި އެނޫން ގޮތަކަށްވެސް އެ ބޯޑު ނެގޭނެ ކަމަށެވެ. އޭގައިވާ ބިޔަ ކެންވާސް (ޔާމީންގެ ތަސްވީރު ޕްރިންޓުކޮށްފައިވާ ސަތަރިގަނޑު) ނައްޓާލުމަށް ފަހު ބޯޑު ވަކިން ނެގޭނެ ކަމަށާއި، ދަގަނޑު ކަފާ ގްރޭންޑަރުން އެ ބޯޑުގެ ފައިތަށް ބުރިކޮށް، ވާ ޖަހައިގެން ވައްޓާލުމުން ދޭހަކޮށްދެނީ އެއްވެސް ވަރެއްގެ ގަދަރެއް އަގެއް ނެތް އެއްޗެއްގެ ގޮތުގައި ކަމަށެެވެ. ރައީސް ޔާމީންގެ އެހެން ސަޕޯޓަރެއްގެ ކަންބޮޑު ވުމަކީ މާލޭގައި މިހާރުވެސް އެތައް ބިލްބޯޑެއްގައި އިންތިހާބު ކާމިޔާބު ކުރެއްވި ޑރ. މުއިއްޒާއި ސެމްބެއާއި އެކު ޔާމިން ހުންނެވި ކެމްޕޭން ބޯޑުތައް ބެހެއްޓުމަށްފަހު ހަމައެކަނި އެ ބޯޑު އަވަސްއަރުވާލައިގެން ވައްޓާލުމުންނެވެ. 2018 ގައި އެމްޑީޕީއިން ރައީސް އިބްރާހިމް މުހައްމަދު ސޯލިހު އިންތިހާބު ކާމިޔާބުކޮށް، ހުވާ ކުރަންދެން އެތައް ދުވަހެއް ވަންދެން ޔާމިން (ރައީސް ސޯލިހާއި 2018ގައި ވާދަކުރެއްވި) ކެމްޕޭނު ބޯޑުތައް ހުރިއިރު، ރައީސް ޔާމީން ނިސްބަތްވާ އެމަނިކުފާނު ލީޑުކުރައްވާ ކޯލިޝަންގެ ވެރިކަމަށް އައުމުން ހުވާވެސް ނުކުރަނީސް އެކަން އެގޮތަށް ކުރަނީ ކޮން ނިޔަތެއްގައި ކުރި ކަމެއްކަން ނޭންގުނަސް އާއްމުންނާ ސިޔާސީ ދާއިރާގެ ފަރާތްތަށް ބުނަމުންދަނީ ރައީސް ޔާމިން މި ވެރިކަމުގަ އެހާ ބޮޑުކޮށް ފެންނަން ބޭނުން ނުވާ ބަޔަކު ކުރުވާ ކަމެއްގެ ގޮތުގައެވެ.
މި ކަމާ ބެހޭގޮތުން އެކަނިކުފާނު ނިސްބާތްވާ ޕާޓީގެ އެއްވެސް އިސް ބޭފުޅެއް ކަންބޮޑުވުން ފާޅުކޮށް، އެކަން ކުށްވެރިކޮށް ވާހަކަދައްކާފައި ނުވެއެވެ. ސިޓީކައުންސިލުންވެސް އާއްމުންގެ ފާޑުކިޔުން އަމާޒުވުމުންވެސް މިކަމާ ބެހޭގޮތުން މިހާތަނަށް ވަކި އެއްޗެއް ބުނެފައި ނުވެއެވެ.
ރައީސް ޔާމީން ވަނީ ގެއަށް ބަދަލު ކުރިފަހުން ނުސީދާކޮށް ޕިޕިއެމް ޕީއެންސީގެ ބައެއް އިސްވެރިންނަށް ފާޑުވިދާޅުވެފައެވެ. އެމަނިކުފާނު ވިދާޅުވީ ބަޔަކު ބޮޑުތި މަގާމުތަކަށް އަންނަނީ އެމަނިކުފާނު ވަރަށް ބޮޑެތި ގުރުބާނީތަކެއް ވެގެން ކަމަށާއި އެހާ އަވަހަށް އެކަން ހަނދާންނެތި ފިނި ކޮޓަރީގައި ތިބޭ ބަޔަކަށް ލީޑަރޝިޕުުން އަމަލުކޮށްގެން ނުވާނެކަމަށެވެ. އެމަނިކުފާނަށްޓަކައި އަަބަދުވެސް މަގުމަތީގައި ތިބެނީ އާދައިގެ އާއްމު މެމްބަރުން ކަމަށާއި އެކަމާ އުފާކުރާ ކަމަށެވެ.
