މިއަދުގެ ވަގުތެއްހައި ފިހާރައަކަށް ވަތް އަންހެނަކު، އެ ފިހާރައިގަ މަސައްކަތްކުރަމުން ދިޔަ ފިރިހެން މުއައްޒަފަކަށް ވަޅިން ހަމަލާދި ޒަހަމްކޮށްލައިފިއެވެ.
ސޯސަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި އެ އަންހެންމީހާ މޯބައިލް ފޯނު ވިއްކާ ފިހާރައަކަށް ވަދެ، ފިރިހެން މުއައްޒަފު ކައިރި ވާހަކަތަކެއް ދައްކާ މަންޒަރު ފެނެއެވެ. އެ އަންހެން މިހާ ބޭރު (ފިހާރަ ދޮރާ ދިމާލުން ބޭރަށް) ބަލާލުމަށް ފަހު ކުއްލިއަކަށް ވަޅި ނަގައި އެ ފިރިހެން މުއައްޒަފުގެ ކަރުގައި ވަޅި އެޅުމަށްފަހު ފިހާރައިން ނިކުމެގެންދާ މަންޒަރު ފެނެއެވެ.
ފުލުހުންގެ މީޑިއާ އޮފިޝަލް ވިދާޅުވީ ތޫނު އެއްޗަކުން ހަމަލާދީފައިވާ ފިރިހެނަކަށް އޭޑީކޭ ހޮސްޕިޓަލްގައި ފަރުވާ ދެމުން ދާކަމުގެ މައުލޫމާތު މިއަދު 11:02 ކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.
މި މައްސަލައާ ގުޅިގެން 29 އަހަރުގެ އަންހެނަކު ހައްޔަރުކޮށްފައިވާ ކަމަށް ފުލުހުން ބުންޏެވެ.
އޭޑީކޭއިން ބުނީ މި ހަމަލާގައި ޒަހަމްވި މީހާއަށް ފަރުވާ ދެމުން އަންނައިރު އޭނާގެ ހާލަތު މިހާރު އަންނަނީ ރަނގަޅު ވަމުން ކަމަށެވެ.
ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.
