ސަރުކާރުގެ ހަރަދުގައި ހިލޭ ހައްޖަށް ފޮނުވަން ނިންމި 1،000 މީހުންގެ ތެރެއިން މި އަހަރު ޙައްޖަށް ފޮނުވާ 50 މީހުން މިއަދު ސައުދީ އަރަބިއްޔާއަށް ފުރައިފިއެވެ.
ފުރަތަމަ ބުރުގައި ހިލޭ ޙައްޖަށް ގެންދާ މީހުންގެ ގުރުނަގާފައިވަނީ މިދިޔަ މާޗު މަހުގެ 10 ވަނަ ދުވަހު، އިސްލާމިކް މިނިސްޓްރީގައި ބޭއްވި ރަސްމިއްޔާތެއްގެ ތެރެއިންނެވެ.
އިސްލާމިކް މިނިސްޓްރީން މައުލޫމާތުދޭ ގޮތުގައި ހިލޭ ހައްޖަށް ފޮނުވާ މީހުންގެ ގުރުއަތު ނަގާފައިވަނީ މުދަލު ޒަކާތް ހައްގުވާ ފަގީރުންގެ ލިސްޓަށް ބަލައިގެންނެވެ. އަދި، ގުރު ނެގުމަށް ބޭނުންކޮށްފައިވަނީ ލިސްޓުގައި ތިބި 667 މީހުންގެ އައިޑީކާޑު ނަންބަރެވެ. އޭރު 50 މީހުންގެ ގުރުއަތު ނެގީ، އޭގެ ތެރެއިން ބަޔަކު އުޒުރުވެރިވެއްޖެ ނަމަ ޖާގަ ދޭނެ 10 މީހުންނާ އެއްކޮށެވެ.
އިސްލާމިކް މިނިސްޓްރީން މީގެ ކުރިން ބުނި ގޮތުގައި މި އަހަރު ޙައްޖަށް ދާން ހޮވުނު 50 މީހުންގެ ތެރެއިން 10 މީހުން ޖާގަ ދޫކޮށްލިއެވެ. އެހެންވެ، ލިސްޓުގައި އޮތް ތަރުތީބުން ގުރުއަތުން ހޮވުނު މީހުންނަށް ވަނީ އެ ޖާގަ ދީފައެވެ.
ޙައްޖުގެ އަޅުކަން އަދާކުރުމުގެ ކެރިފޯރުންތެރިކަން ލިބިފައިނުވާ 1000 ރައްޔިތުން ހިލޭ ސަރުކާރުގެ އެހީގައި ހައްޖަށް ފޮނުވުމުގެ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
