ރައްޔިތުންގެ މަޖިލީހުގެ ރިޔާސަތު ދޫކުރައްވާ ރައްޔިތުންގެ މަޖިލީހުގެ މައްޗަންގޮޅި މެދު ދާއިރާގެ ގޮނޑި ތަމްސީލްކުރައްވަން ބޭނުންފުޅުވާކަމުގެ އިޝާރާތެއް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ދެއްވައިފިއެވެ.
މިއަދު ކުރިއަށްދިޔަ މުދަލާއި ހިދުމަތުގެ އަގު ބޮޑުވުން ކޮންޓްރޯލްކުރުމަށް ސަރުކާރަށް ގޮވާލާ ގަރާރުގެ ބަހުސްގެ ތެރެއިން ނަޝީދު ވިދާޅުވީ، މަޖިލިހަށް ހުށަހަޅާ ކަންކަމުގައި ބަހުސް ކުރައްވަން ކެތް މަދުވެފައި ހުންނެވި ކަމަށާއި، މެދު ދާއިރާ ތަމްސީލްކޮށް، ބަހުސްގައި ބައިވެރިވެވޭނެ ކަމަށް އުންމީދުކުރާ ކަމަށެވެ.
މަޖިލީހުގެ ރިޔާސަތުގައި އިންނަވައި ވާހަކަފުޅު ދައްކަވަމުން ނަޝީދު މިއަދު ވަނީ އެ މައްސަލާގައި އެމަނިކުފާނު ދެކިވަޑައިގަންނަވާ ގޮތް ވަރަށް ކުރުކޮށް ވިދާޅުވެފަ އެވެ.
”މެންބަރުންނަށް އެނގިވަޑައިގަންނަވާނެ އަޅުގަނޑު ކެތްމަދުވެފައި ހަގީގަތުގައި ރިޔާސަތުގައި މި އިންނަނީ. އުންމީދު ކުރެވެނީ މެދު ދާއިރާގެ ބަހުސްގައި ބައިވެރިވެވޭނެ ކަމަށް،“ ނަޝީދު ވިދާޅުވި އެވެ.
މަޖިލީހުގެ ރައީސްކަމަށް ނަޝީދު އިންތިހާބުކުރައްވާފައިވަނީ، 2019 ވަނަ އަހަރުގެ މެއި މަހުގެ 28 ވަނަ ދުވަހު ބެއްވި ރައްޔިތުންގެ މަޖިލީހުގެ 67 ވަނަ ޖަލްސާގައި، 67 މެންބަރުންގެ އަގުލަބިއްޔަތުންނެވެ. ނަޝީދާ ވާދަ ކުރެއްވި ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހިމަށް އެ ފަހަރު ލިބިވަޑައިގެންނެވީ 17 ވޯޓެވެ.
ރައްޔިތުންގެ މަޖިލީހުގެ ރައީސްގެ މަގާމުން، ރައީސް ނަޝީދު ވަކިކުރަން ފާސްކޮށްފައިވާއިރު، ގާނޫނުއަސާސީގައިވާ ގޮތުން ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތް ކަމަށް ދެބައިކުޅަ އެއްބައި މެންބަރުންގެ ވޯޓުން ފާސްވާނެއެވެ. އެއީ 87 މެމްބަރުންގެ ތެރެއިން 44 މެމްބަރުންގެ ވޯޓެވެ. ނަޝީދު އިތުބާރު ނެތް ކަމުގެ މައްސަލާގައި މިހާތަނަށް ވަނީ 54 މެމްބަރުން ސޮއިކުރައްވާފައެވެ.
މަޖުލީހުގެ މަސައްކަތް ހުއްޓާލައި ހަމައެކަނި އިދިކޮޅު މެމްބަރުންގެ ގަރާރާއި، އެމަނިކުފާނު އުފައްދަވާ ސިޔާސީ ޕާޓީގެ މަޖްލިސް މެމްބަރުން ހުށައަޅާ ގަރާރުތައް ފިޔަވައި އެހެން ކަމެއް މަޖުލީހުގައި ކުރަމުންނުދާތީ އާއްމުންނާ އަދި އެހެން މެމްބަރުންގެ ފާޑުކިޔުން އިންތިހާއަށް ނަޝީދަށް ވަނީ އަމާޒުވެފައެވެ.
