ރައީސް ނަޝީދަށް ރޭގެ ވަގުތެއްގައި ދިން ނުރައްކާތެރި ޓެރަރިސްޓު ހަމަލާ ކުށްވެރިކޮށް، އެކަމާ ބެހޭ ގޮތުން މެޑަމް ލައިލާގެ ބަޔާނެއް ކަމަށް ބުނާ ލިއުމެއް ސޯސަލް މީޑިއާގައި ދައުރުވަމުންދާ ކަމަށާއި ނަމަވެސް އެއީ މެޑަމް ލައިލާގެ ސްޓޭޓްމަންޓެއް ނޫން ކަމަށް، ރައީސް ނަޝިދުގެ ދަރިކަނބަލުން މީރާ ނަޝީދު ހާމަކުރައްވައިފިއެވެ. އެ ސްޓޭޓްމަންޓު ޓެގްކޮށް އެއީ މަންމަ ގެ ބަޔާނެއް ނޫން ކަމަށާއި މި ކަމާބެހޭ ގޮތުން ޕަބްލިކް ސްޓޭޓްމަންޓެއް ނުދެއްވާ ކަމަށްވެސް ވަނީ ހާމަކުރައްވާފައެވެ.
މެޑަމް ލައިލާއަކީ ރައީސް ނަޝިދު ސިޔާސީ ދިގު ހަޔާތުގައި މީޑިއާއަށް އެއްވެސް ވަރަކަށް ވަހަކަ ދައްކަވައި އުޅުއްވި ބޭފުޅެއް ނޫނެވެ. މައުލޫމާތު ލިބޭ ގޮތުގައި ރައީސް ނަޝީދުގެ އާއިލާ މި ވަގުތު ދިރިއުޅުއްވަނީވެސް ރާއްޖެއިން ބޭރުގައެވެ.
މިހާރަކަށް އައިސް ބައެއް ފަރާތްތަކުން ސޯސަލްމީޑިއާއިން ފެންނަ ލިއުންތަކާ މައުލޫމާތުތައް، ތެދުދޮގު ބެލުމެއްނެތި އާއްމުންގެ ތެރޭގައި ފަތުރަމުންދެއެވެ. އަދި ބައެއް ފަހަރު މީޑިއާއިން ވެސް މި ފަދަ ލިއުންތަކުގެ ތެދުދޮގު ބެލުމެއް ނެތި ހަބަރުގެ ގޮތުގައި ’އާއްމުންނަށް އޮޅޭ ފަދަ‘ ގޮތްގޮތަށް ގެނެސްދީފައި ހުރެއެވެ. ބްރޮޑްކާސްޓިން ކޮމިޝަނުން މިރޭވެސް މަނީ މި ކަހަލަ ކަންތައްތަކުގައި ސަމާލުވުމަށް މީޑިއާތަކަށް ގޮވާލާ ބަޔާނެއްވެސް ނެރެފައެވެ.
