ރައްޔިތުންގެ މަޖުލީހުގެ ރައީސް އިތުބާރު ނެތް ކަމުގެ މައްސަލާގައި މަޖުލިސް ހުއްޓިފައިވާތީ އެމްޑީޕީން ސްޕްރީމް ކޯޓަށް ހުށައަޅާފައިވާ ދުސްތޫރީ މައްސަލައަށް ވީހާވެސް ގިނަ ޕާޓީތައް ތަދައްހުލު ވުމަށް މަޖުލީހުގެ އަމީންއާއްމު އެދިފައިވާ ކަމަށް ބައެއް މެމްބަރުން ތުހުމަތުކޮށްފިއެވެ. މުރާސިލަށް މައުލޫމާތު ދެއްވަމުން މެމްބަރަކު ވިދާޅުވީ ވީހާވެސް ގިނަ ސިޔާސީ ޕާޓީތަކެއް މި މައްސަލައަށް ތަދައްހުލުވުމަށާއި މަޖުލީހުގެ އަމީންއާއްމުގެ ނިންމުމާ އެއްކޮޅަށް ކޯޓުގައި ވަކާލާތުކޮށްދޭން ވަނީ އެދިފައެވެ. މަޖުލިޙުގެ އަމީންއާއްމު ބޭނުންވަނީ ވީހާވެސް ގިނަ ސިިޔާސީ ޕާޓީތަކުންނާއި އެ ޕާޓީތައް ތަމްސީލުކުރާ މެމްބަރުން ސްޕްރީމް ކޯޓުގައި ’އީވާ ނޫން ގޮތެއް ނެތް‘ ކަމަށް ބުނެ މަޖުލީހުގެ އިދާރީ މޭޒުން ނިންމާފައިވަނީ ރަނގަޅަށް ކަމަށް ވަކާލާތުކޮށްދިނުމަށެވެ.
ރައްޔިތުން މަޖުލިސް ހުއްޓިފައިވަނީ، މަޖުލީހުގެ ރައީސް މުހައްމަދު ނަޝީދު އިތުބާރު ނެތް ކަމުގެ މައްސަލައިގަ ބާއްވަން ޖެހޭ ޖަލްސާއަށް މަޖުލީހުގެ ނައިބްރައީސް އީވާ ހާޟިރު ނުވުމުންނެވެ. ނަޝީދުގެ އިތުބާރު ނެތް މައްސަލަ އެޖެންޑާކުރާ ކޮންމެ ދުވަހަކު އީވާ ވަނީ މަޖުލީހަށް ހާޟިރު ނުވެވޭނެ ކަމަށް ބުނެ ’ސަލާމް‘ ފޮނުވާފައެވެ. މަޖުލީހުގެ ރިޔާސަތުގައި އީވާ ނެތިސް ޖަލްސާ ބާއްވަން އަމީންއާއްމު ނިއުޝާ ދެކޮޅެވެ. މީގެ ކުރިންވެސް ނަޝީދު އިތުބާރު ނެތް ކަމަށް ހުށައެޅި މައްސަލަތައް އެޖެންޑާ ނުކޮށް، ޖަލްސާ ބޭއްވުމަށްވެސް އަމީންއާއްމުވަނީ ހުރަސް އަޅާފައެވެ.
މިހާރު ސްޕްރީމް ކޯޓުގައި ހިނގަމުންދާ މައްސަލާގައި ޕީޕީއެމުންވެސް ވަކާލާތު ކުރަމުންދަނީ ނަޝީދުގެ ދިފާއުގައެވެ.
