މީހުން ދިރިނޫޅޭ މ. ހައުސް ޕްލާޒާގައި ހުންނަ އެ ގުދަނުގައި ރޯކޮށްލި މައްސަލާގައި ދެ މީހަކު ހައްޔަރު ކޮށްފިއެވެ. ފުލުހުން މައުލޫމާތުދޭ ގޮތުގައި އެ މީހުން ހައްޔަރުކޮށްފައިވަނީ ހައުސް ޕްލާޒާ ހުންނަ ސަރަހައްދުންނެވެ.
ހައުސް ޕްލާޒާގެ ގުދަނެއްގެ ގޮތުގައި ބޭނުން ކުރަމުންދިޔަ އިމާރާތެއްގައި ރޯވި އަލިފާންގަނޑު އެމްއެންޑީއެފުން މިހާރު ވަނީ ނިއްވާލައިފައެވެ. އެ ހާދިސާގައި އެއްވެސް މީހަކަށް އަނިޔާއެއް ނުވެއެވެ.
އެ ސަރަހައްދުގެ މީހުން ބުނާ ގޮތުގައި މީހުން ނޫޅޭ އެތަނަށް މަސްތުވާތަކެތި ބޭނުންކުރާ މީހުން ވަރަށް ގިނައިން ވަންނަ ކަމަށާއި، ބެލެވޭ ގޮތުގައި އެއީ އެމީހުންގެ ކަމަކަށްވެސް ވެދާނެ ކަމަށެވެ.
ރޭ ފަތިހު ’ވެގަ ޕޮއިންޓް‘ ފިހާރައިގައިވެސް އަލިފާނުގެ ހާދިސާއެއް ވަނީ ހިނގައިފައެވެ. އެ ހާދިސާގައި ފިހާރަ އެއްކޮށް އަނދައި ހުލިވެފައިވާ އިރު، އެ ފިހާރަ ކައިރީގައި ހުރި 15 ވަރަކަށް ސައިކަލްވެސް ވަނީ ބޭނުން ނުކުރެވޭ ވަރަށް އަނދައިފައެވެ.
