ރައްޔިތުންގެ މަޖްލިސް ރައީސް އަދި ކުރީގެ ރައީސް މުހައްމަދު ނަޝިދަށް އަމާޒުކޮށް މިރޭ ދިން ހަމަލާއަކީ ރާއްޖޭގެ އިގްތިސޯދަށާއި ޑިމކޮކްރަސީއަށް ވެސް ދިން ހަމަލާއެއް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ. މި ރޭ ދަންވަރު 2:30 ގައި ދެއްވި ކުރު ތަގުރީރުގައި، ގައުމާ މުހާތަބްކޮށް އެމަނިކުފާނު ވިދާޅުވީ މި ހަމަލާގެ މައްސަލަ ވަރަށް ސީރިއަސް މައްސަލައެއްގެ ގޮތުގައި ބަލާނެ ކަމަށާއި އޮސްޓްރޭލިއަން ފުލުހުންގެ ތަޖުރިބާކާރުންގެ ޓީމެއް އަންނަ ހޮނިހިރު ދުވަހު ތަހުގީގަށް ރާއްޖެ އަންނާނެ ކަމަށެވެ.
އެމަނިކުފާނުގެ އެންމެ އަރިސް ޒަމާންވީ އެކުވެރިޔާ އަދި އެމްޑިޕީގެ ރައީސް ނަޝީދުގެ މިވަގުތުގެ ހާލަތުވެސް ކުރުގޮތަކަށް ހޮސްޕިޓަލާ ހަވާލާދެއްވާ ވިދާޅުވިއެވެ. މިގޮތުން ރައީސް ނަޝީދަށް ހާއްސަ ޓީމަކުން ފަރުވާދޭ ކަމަށާއި އިތުރު ފަރުވާއަށް ސާޖަރީއެއް ކުރިއަށްދާ ކަމަށް އޭޑީކޭ ހޮސްޕިޓަލުން މައުލޫމާތު ދެއްވާ ކަމަށް އެމަނިކުފާނު ވިދާޅުވިއެވެ.
މިރޭގެ ހަމަލާގައި ރައީސް ނަޝީދާއި އެމަނިކުފާނުގެ ބޮޑީގާޑުންނަށް އެކިވަރުގެ އަނިޔާތައް ލިބި، ހޮސްޕިޓަލުން ވަނީ ފަރުވާ ދީފައެވެ. ރައީސް ނަޝީދު ފިޔަވައި އެންމެން މިހާރު ވަނީ ފަރުވާއަށް ފަހު ހޮސްޕިޓަލުން ދޫކޮށްލާފައެވެ.
