އިއްޔެއާ ހަމައަށްވެސް އަދި ރޭގެ ފަތިހާ ހަމައަށްވެސް އަލް ސަފާ އުމުރާ ގުރޫޕުން އުމުރުރާގެ އަޅުކަމަށް ސައުދީއަށް ފުރުމަށް އެއްވެސް މައްސަލައެއް ނެތެވެ. ގުރޫޕުގެ ފަރާތުން މި މަހު ބޭއްވި ބައްދަލުވުމުގައި ވެސް އެއްވެސް ކަމެއް ހަމަޖެހިފައި ނުވާ ކަމުގެ އިޝާރާތެއްވެސް ނުދެއެވެ. އެހެން ކަމުން އުމުރާއަށް ދިއުމަށް ރާއްޖޭގެ އެކި ހިސާބުތަކުން މާލެއައިއްސަ ތިބި މީހުން ރޭގައި ތައްޔާރުވެގެން ތިބީ މިއަދު ހެނދުނު އެއަރޕޯޓަށް ދިއުމަށެވެ. ނަމަވެސް ކުއްލިއަކަށް ހެނދުނު، އެ ޖަމާއަތުގައި އުމުރާއަށް ދާ މީހުންގެ ވައިބަރ ގުރޫޕަށް ފޮނުވި މެސެޖުގައި ބުނެފައިވަނީ ސައުދީ އަރަބިއްޔާއިން، އެ ގުރޫޕުގެ އެއްވެސް މީހަކަށް ވިސާ ހަމަ ނުޖެހޭ ކަމަށާއި ދަތުރު ކެންސަލު ކަމަށެވެ. އޭރު އެއަރޕޯޓަށް ދިއުމަށް ވަގުތު ވަނީ ކުޑަތަން ވެފައެވެ. އެންމެން ގެ ވެސް ފޮށީ އެއަރޕޯޓަށް ގެންގޮސް ސޮފްޓު ޗެކިން ހަދާފައި ވުމުން، ފޮށިތައްވެސް އަނބުރާ ގެންދިއުމަށް ގުރޫޕުން އިލްތިމާސްކޮށްފައި ވެއެވެ. ކެންސަލް ކުރި ދަތުރަށް ދެން ވާނެ ގޮތަކާއި ފައިސާ ރިފަންޑުގެ ވާހަކައެއް މިހާތަނަށް އަލް ސަފާ ގުރޫޕުން ބުނެފައި ނުވެއެވެ.
އަލް ސަފާ ގުރޫޕުން މި ފަހަރު އުމުރާއަށްދާ މީހުންގެ ތެރޭޣައި ކޮވިޑް ބަލިމަޑުކަމުގައި ވަކި ވަރަކަށް މީހުން ގެންދަން ޖެހުމުގެ ސަބަބުން ޖާގަ ނުލިބުނު މީހުންނާއި އުމުރުން ދުވަސްވީ މީހުންވެސް ހިމެނެއެވެ. ސަފާ ގުރޫޕުން މިއަދު 130 އަށް ވުރެ ގިނަ މީހުން ފުރާ ގޮތަށް ހަމަޖެހިފައިވެއެެވެ.
މިއަދު ފުރަން އޮތީ ރޯދަމަހުގެ ފަހު 15 ދުވަހާއި ޝައްވާލް މަހުގެ ހަ ރޯދަ ހިމެނޭ ގޮތަށް ކުރާ ޢުމުރާ ދަތުރުގެ ބައިވެރިންނެވެ. މި ޢުމްރާގެ އަގަކީ 40،000ރުފިޔާއެވެ.
ފަހު ވަގުތު ޢުމްރާ ދަތުރު ކެންސަލް ކުރުމުން، ސަފާ ގުރޫޕުން ޢުމްރާއަށް ދާން ފައިސާ ދައްކާފައިވާ އެތައް ބަޔަކު އަންނަނީ ވަރަށް ބޮޑަށް ނުރުހުން ފާޅުކުރަމުންނެވެ. މި ކަމާ ގުޅިގެން ސަފާ ގުރޫޕުގެ ބަހެއް ލިބިފައިނުވާތީ މި ކަމާ ގުޅޭ އިތުރު ތަފުސީލެއް ލިބިފައެއް ނުވެއެވެ.
ހައްޖާއި އުމުރާ އަދި ސައުދީ އަރަބިއްޔާގެ ވިސާގެ ކަންކަން އިނގޭ މީހުން ބުނާ ގޮތުގައި ކުރީބައިގަ އުޅުނު ނަމަ މި ކަން އޮންނާނީ ހަމަޖެިހައެވެ. އާއްމުކޮށް މިހެން ދިމާވަނީ އެޖެންޓާ ފައިސާގެ މައްސަލަ ޖެހި ނުވަތަ އެނޫންވެސް އިހުމާލެއްގެ ސަބަބުން ނެވެ.
ރޯދަމަހުގެ ފަހު ދިހައެއްގައި ދުނިޔޭގެ ކަންކޮޅުތަކުން ގިނަ އަދަދެއްގެ ބަޔަކު މި ދުވަސްކޮޅު ސައުދީއަށްދާއިރު، ރާއްޖެއިންވެސް މިއަދު ގިނަ ބަޔަކު އުމުރާއަށް ފުރާގޮތަށް ވަނީ ހަމަޖެހިފައެވެ.
މީގެ ކުރިންވެސް ވަނީ ހައްޖާއި އުމުރާއަށް މީހުން ގެންދިއުމުގައި އެކި ވަރުގެ އިހުމާލ ވެައެވެ. މިގޮތުން ދަތުރު ކެންސަލް ކުރުމާއި އެޑްވާންސަށް ދެއްކ ފައިސާ ނުލިބުމާއި ސަރުކާރުން ކަނޑައަޅާ އަގުތަކަށް ވުރެ ބޮޑު އަގު ނެގުން ފަދަ އތައް ކަމެކެވެެ
