ރާއްޖެއަށް މިހާރު ކުރިމަތިވެފައިވާ އިގްތިސާދީ ހާލަތައް ބަލައި ތަރައްގީގެ މަސައްކަތްތައް ކުރިއަށް ގެންދަން އިސްކަން ދޭން ޖެހޭ ތަރުތީބެއް އެކުލަވާލަން ޖެހޭ ކަމަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ތ.އަތޮޅުގެ ބައެއް ރަށްރަށަށް މިއަދު ފެއްޓެވި ދަތުރުފުޅުގައި އެ އަތޮޅު ދިޔަމިނގިލީގެ ރައްޔިތުންނާ މުހާތަބުކޮށް ވާހަކަފުޅު ދައްކަވަމުންނެވެ.
ރައީސް ގެ ވާހަކަފުޅުގައި، ހުއްޓިފައިހުރި މަޝްރޫޢުތަކާއި އަދި ކުރިއަށްހުރި ހުރިހާ މަޝްރޫޢެއްވެސް މި ސަރުކާރުން ކުރިއަށްގެންދަވާނެ ކަމުގެ ޔަގީންކަން ދެއްވިއެވެ. އެހެންނަމަވެސް މިހާރު ގައުމަށް ކުރިމަތިވެފައިވާ އިޤްތިޞާދީ ހާލަތާ ގުޅިގެން މަސައްކަތްތައް ކުރިއަށް ގެންދިއުމުގައި އެންމެ އިސްކަންދޭ ތަރުތީބެއް އެކުލަވައިލަންޖެހޭކަން އެމަނިކުފާނު ތަކުރާރުކުރެއްވިއެވެ. އެގޮތަށް ތަރުތީބުކުރެވުމުން އެރަށުގެ ތަރައްޤީއަށް ހުރި ގިނަ ކަންކަން މިއަހަރުގެ ތެރޭގައިވެސް ފެށޭނެކަމަށް އުންމީދުކުރައްވާކަމުގައި ވިދާޅުވިއެވެ. ހަމައެހެންމެ ކޯޒްވޭގެ މަސައްކަތްވެސް ހަޤީޤަތަކަށް ހެދޭނެކަމުގައި ރައީސް ވިދާޅުވިއެވެ.
ތ.އަތޮޅަށް މިހާރު ކުރައްވާ ދަތުރުފުޅުގައި އެ އަތޮޅު ގުރައިދޫއަށް ވަޑައިގެން ރައްޔިތުންނާ މުހާތަބުކޮށް ވާހަކަފުޅު ދައްވަމުންވެސް ވިދާޅުވީ ރާއްޖޭގެ އިގްތިސާދު މި ވަގުތު މިއީ އެންމެ ހައްސާސް ދަނޑިވަޅު ކަމަށެވެ. އެ ހަގީގަތް ގަބޫލު ކުރަން ޖެހޭނެ ކަމަށާއި ނަމަވެސް އިންތިހާބަށް ކަޑަ ޖަހާ އުސޫލުން ތަރައްގީގެ މަޝްރޫއުތައް ކުރިއަށް ނުގެންދާނެ ކަމަށްވެސް ވިދާޅުވިއެވެ. އެމަނިކުފާނުގެ ރިޔާސީ ކެމްޕޭނުގެ ވައުދެއްކަމަށްވާ ތ.ގުރައިދޫގައި އެއަރޕޯޓެއް ހައްދަވައިދެއްވާނެ ކަމަށާއި މިއަހަރުގެ ބަޖެޓުގައި އެބައި ހިމެނިފައިނެތަސް ކުރިއަށް އޮތް ދުވަސްތަކުގައި އެކަން ފުރިހަމަކޮށްދެއްވާނެ ކަމަށް ވިދާޅުވިއެވެ.
